Ukrayna Rusiyanın dərinliklərindəki Rusiya raket buraxılış qurğularını vurmaq üçün “Starlink” peyklərindən istifadə etmək istəyir. Lakin “SpaceX”in sahibi, milyarder İlon Mask Ukrayna Silahlı Qüvvələrinə bu imkanı verməkdən imtina edir. 

“AzPolitika” xəbər verir ki, bu barədə “The Atlantic” nəşri məlumatlı mənbələrə istinadla xəbər yayıb.

Nəşrin mənbələrinə görə, bu ilin əvvəlində Maskla Rusiya qoşunları üçün “Starlink”in bloklanması barədə razılığa gələn keçmiş müdafiə naziri Mixail Fyodorov, sonradan Ukraynaya Rusiyanın dərinliklərini vurmaq üçün həmin sistemdən istifadə barədə Maska müraciət edib. Onun vasitəsilə Ukrayna beynəlxalq səviyyədə tanınmış Rusiya ərazisi üzərindən “Starlink” peyklərinə qoşulmağa icazə verməsi üçün Maskı razı salmağa çalışır. Məlumata görə, Fyodorov bunu "pərdəarxası vasitələrlə" edir.

Bu, Rusiyanın raket buraxılış nöqtələrini vurmağa və Ukraynanın ballistik raket hücumları problemini həll etməsinə kömək edə bilər. Lakin bu cəhdlərə baxmayaraq, Fyodorova yaxın mənbələr qeyd edirlər ki, "hazırda heç bir müsbət cavab yoxdur". Mənbələr bildirib ki, Mask sülh müqaviləsinin zəruriliyində israr edir və Rusiyanın dərinliklərinə zərbələrə icazə verilərsə, eskalasiya olacağını bildirir.

Hazırda Ukrayna qoşunları “Starlink” vasitəsilə Rusiya hədəflərinə yalnız Krım və işğal olunmuş digər ərazilər daxil olmaqla rəsmi olaraq tanınmış Ukrayna ərazisində hücum edə bilərlər. Rusiya ərazisini isə “Starlink”dən istifadə edərək vurmaq olmaz.

Ukrayna hərbi şirkəti “Fire Point”in həmtəsisçisi Denis Ştilerman bildirib ki, dronların “Starlink” modulları ilə təchiz edilməsi Rusiyadakı mobil hədəflərin daha dəqiq vurulmasına imkan verəcək. Ştilermanın sözlərinə görə, hazırda “SpaceX” peyk rabitəsi cəbhə xətti boyunca istifadə olunur, lakin Rusiyada bu sistemdən istifadə etməklə bu zonanı 500 kilometrə qədər genişləndirmək və hətta potensial olaraq Sibirə çatmaq mümkün olardı.

Xatırladaq ki, iki həftə əvvəl Mask "The Economist"ə verdiyi müsahibədə Rusiyanın öz qoşunlarını Ukraynadan çıxarmayacağını və müharibənin yalnız Moskvaya güzəşt etməklə dayandırıla biləcəyini demişdi.

“AzPolitika.info”