Türkiyə Prezidenti Rəcəb Tayyib Ərdoğan Rəcəb Tayyib Ərdoğan “Əl-Cəzirə” telekanalına müsahibəsində Türkiyənin xarici siyasəti, regional və qlobal proseslərlə bağlı mühüm açıqlamalar verib.

Ərdoğan Türkiyə, Səudiyyə Ərəbistanı və Pakistan arasında imzalanan Məkkə Sazişinin dünya sülhü baxımından mühüm mesaj olduğunu bildirib.

“Türkiyə, Səudiyyə Ərəbistanı və Pakistan arasında Məkkədə bu üçtərəfli sazişin imzalanması dünyaya mühüm mesaj verməyimiz üçün əsl fürsət oldu”, – deyə Ərdoğan qeyd edib.

Türkiyə lideri bu əməkdaşlığın gələcəkdə genişlənə biləcəyini bildirib. Onun sözlərinə görə, Misirin təşəbbüs göstərməsi halında Ankara Qahirə ilə danışıqlara açıqdır.

Ərdoğan Suriya məsələsinə də toxunaraq bu ölkəni Türkiyənin “qardaşı” adlandırıb. O, Suriyanın tək buraxılmayacağını və ölkədə sabitliyin təmin olunması üçün Türkiyənin üzərinə düşən məsuliyyətləri yerinə yetirməyə davam edəcəyini vurğulayıb. Ərdoğan həmçinin yaxın zamanda Dəməşqə səfər edəcəyini açıqlayıb.

Prezident Qəzza məsələsinə də toxunaraq bölgənin heç vaxt tək buraxıla bilməyəcəyini bildirib. Ərdoğan Türkiyənin indiyədək üzərinə düşənləri etdiyini və bundan sonra da etməyə davam edəcəyini vurğulayıb.

O, HƏMAS-ın səmimi yanaşma nümayiş etdirməsinə baxmayaraq, İsrailin hücumlarını davam etdirdiyini və bunun sülhün qarşısındakı əsas maneələrdən biri olduğunu bildirib.

"AzPolitika.info"