"TÜRKİYƏ RESTORANINDA KEFLİ ŞƏKLİNİ YAYMIŞDILAR..." - İki Fəzailin söz atışması

Ana Vətən Partiyasının sədri, deputat Fəzail Ağamalı “Yeni Müsavat”a müsahibəsində həmkarı Fəzail İbrahimli ilə bağlı sərt fikirlər səsləndirib.

Belə ki, bu ilin oktyabrında Fəzail Ağamalının oğlunun qəza törətməsi xəbəri yayılsa da, sonradan bunun Fəzail İbrahimlinin oğluna aid olduğu təsdiqini tapıb.

Fəzail Ağamalı isə xəbərin yanlış yayılmasında həmkarını günahlandıraraq belə deyib.

“Həmkarım Fəzail İbrahimlinin cinayət törədən oğlunun adını övladımın adı ilə dəyişərək, düşünülmüş şəkildə oğlumu gündəmə gətirməsi çox böyük namərdlikdir. Sadəcə olaraq ona nə deyim? Görünür, bu onun həyat tərzidir. Fəzail İbrahimli üçün kiminsə kölgəsinə sığınmaq halları adi bir şeydir. Hər halda o iki gün ərzində təkzib edə bilərdi ki, gedən fikirlər yanlışdır. Amma bu cəsarəti özündə tapa bilmədi”.

Deputat Fəzail İbrahimli Modern.az-a açıqlamasında həmkarına daha sərt cavablar verib.

“Fəzail Ağamalı mətbuata verdiyi müsahibəsində mənimlə bağlı da danışıb. Burada məsələ belədir. Əgər şəxsiyyətimə təhqiramiz formada toxunulmasa idi, hesab edərdim ki, 70 yaşlı kişidir. Səhhətində problemlər var. Buna görə keçmək olar. Təəssüf ki, 70 yaşlı insan “gözünü yumub ağzını açaraq” məni ittiham edib. Deməli, oktyabrın əvvəllərində “Fəzail Ağamalının oğlu qəza törədib” adlı yazı saytların birində getdi. Elə oldu ki, həmin sayt bununla bağlı təkzib verərək, xəbərin yanlış olduğunu bildirdi və üzr istədi. Amma şər-böhtan məsələsində bunun adı ilk ağla gəldiyindən jurnalist də Ağamalının adını yazıb. Fəzail Ağamalı adını siyasi və şəxsi həyatda elə təqdim edib, bu adın altına elə minalar basdırıb ki, 17 ildir bu minaları təmizləməklə məşğulam. Elə imic formalaşdırıb ki, mənfi məsələlərdə Fəzail Ağamalının adı gündəmə gəlir. İndi də Fəzail Ağamalı məni namərdlikdə ittiham edib. Axı mən müsahibə verib deməmişəm “bu Fəzail Ağamalının oğludur, mənim oğlum deyil”. Sadəcə, məndən soruşublar, demişəm ki, oğlum qəza törətməyib, yıxılana kömək edib. Bunu deməklə məsələni öz üzərimə götürmüşəm. Axı “oğlumun xəbəri yoxdur” deməmişəm”.

Fəzail İbrahimli deyir ki, bu məsələdə qərəz var.

“Fəzail Ağamalının bu ittihamlarında qərəz var. 2 ay bundan qabaq olmuş hadisə hardan bunun yadına düşüb? Fikirləşdim ki, bu neçə vaxtdı ortada yoxdur. Onun bu hərəkəti gündəmdə qalmaqdan çox, içindən gələn bir hala bənzəyir.

Əslində bu da Fəzail Ağamalının həyat tərzidir. Şirin-şirin müsahibə verdiyin qəzet Türkiyə restoranında oturduğun kefli formada olan şəklini yaymışdı. İndi oturub həmin qəzetə tərtəmiz cümlələrlə səmimi müsahibə verirsən və Fəzail İbrahimlini namərdlikdə günahlandırırsan. Amma hər kəs bilir ki, sən kimsən. Özünə cəmiyyətdə mənfi imic formalaşdırmısan. İndi mənim adımı öz adınla eyniləşdirirsən. Ağsaqqal vaxtında belə söhbətlər edirsən. Biz neçə vaxtdır ki, Allaha dua edirik, Fəzail müəllim sağalsın, işinin başına dönsün. Bu da durub hansı məsələlərlə gündəmə gəlir... Sadəcə bir sözünə görə Fəzail Ağamalıya təşəkkür edirəm: “Biz ayrı-ayrı adamlarıq”. Doğru deyib. Təsdiqləyirəm. Allah eləməsin biz eyni adamlar olaq. Bu mənə çox ağır olardı”.

***

"Bu xəbərlər məni daha çox narahat etdi, böyük təəssüf hissi yaratdı. Guya oğlum Yalçın maşınla kimisə vurub. Sonradan bəlli oldu ki, burada çox ciddi yanlışlığa yol verilib. Qəza törədənin yaşı və maşınla bağlı məlumatlar yanlış idi". Bu sözləri millət vəkili Fəzail Ağamalı oğlu Yalçının maşınla adam vurması barədə yayılan və sonradan təkzib edilən xəbərlə bağlı Musavat.com-a müsahibəsində deyib.

O bildirib ki, həmin vaxtı Yalçının oğlu, yəni nəvəsi Türkiyədə universitetə qəbul olmuşdu və Yalçın da onun işləri ilə bağlı Türkiyədə idi. O, hadisəni törədənin kimliyini də bildirib: “Hadisəni həmkarım Fəzail İbrahimlinin oğlu törətmişdi. Onun oğlu həqiqətən qəza törədib, adam vurub. Bunlar olan şeydir. Allah hər kəsdən uzaq eləsin. Kim indi bundan sığortalanıb? Yaxşı ki, həmkarımın oğlu vurduğu adamı xəstəxanaya aparıb, bədbəxt hadisə də baş verməyib. Oğlumun adını bu cür hallandırmaq məndə çox təəssüf hissi yaratdı. Araşdırmalarımız nəticəsində məlum oldu ki, bunu edən Fəzail İbrahimli olub. Oğlum Yalçın olduqca ciddi həyat tərzi keçirir. Siz bir jurnalist kimi ölkəmizdəki fəal, tanınan insanların mütləq əksəriyyətinin hətta ailə üzvləri haqqında belə məlumatınız var. Digər oğlum Elçin haqqında bəzi məlumat hər kəsdə ola bilər. Çünki mətbuata çıxıb, müsahibələr verib. Amma Yalçın qapalı bir həyat keçirir. Onu kim tanıya bilər? Bunu ancaq tarix fakültəsini bitirən, tarix üzrə elmlər namizədi olan həmkarım Fəzail İbrahimli tanıya bilər. Öz oğlunu Yalçının adı ilə dəyişdirərək, düşünülmüş şəkildə övladımı gündəmə gətirmək çox böyük namərdlikdir. Bu namərdlik məni narahat etdi. Mən heç bir halda belə etməzdim”.

F.Ağamalı bir millət vəkilinin öz övladını xilas etmək üçün başqa bir millət vəkilinin övladını nahaqdan gündəmə gətirdiyini və bunu kəskin qınadığını deyib: “Həmin portala məlumat klinikadan ötürülüb. Görünür, onların arasında əməkdaşlıq var. Portal da məsələni ən azından, dəqiqləşdirə bilərdi. Fəzail Ağamalı və onun ailəsi haqqında istənilən jurnalistlə məlumatı dəqiqləşdirmək çətin deyildi. Təəssüf ki, bu olmadı. Heç bir şəxs üçün belə halın yaşanmasını istəmirəm. Mətbuat unutmamalıdır ki, hər hansı bir yanlış fikir ailədə stress, problemlər, əsəbilik yaradır”.

F.Ağamalı həmkarı F.İbrahimli ilə hələ ki, üz-üzə gəlmədiyini də bildirib: “Görünür, bu onun həyat tərzidir. Fəzail İbrahimli üçün kiminsə kölgəsinə sığınmaq halları adi bir şeydir. Hər halda o iki gün ərzində təkzib edə bilərdi ki, gedən fikirlər yanlışdır. Amma bu cəsarəti özündə tapa bilmədi. Özlərinin dilindən dedikləri kimi, mətbuata da deyə bilərdi ki, həmin şəxs təsadüfən yıxılıb, oğlum da götürüb xəstəxanaya aparıb. Bir söz deyim, düz yolda ayağı ilişib yıxılan adam xəstəxanalıq olar? Bu təkzibi də vermədi, sadəcə susdu. Vurulan şəxs nə üçün şikayətçi olub-olmadığı məsələnin başqa tərəfidir. İstəməzdim ki, onun oğluna da hər hansı bir ciddi problemlər yaransın. Onunla üz-üzə gələndə düşünürəm ki, nə deyəcəm”.

Axar.az