BİRİ GENERAL, 23 NƏFƏRİ XİLAS EDİB, AMMA... - Qəhrəman pilot ölkə rəhbərliyindən kömək istəyir (FOTOLAR + VİDEO)

1983-cü ildə Sasov təyyarəçilik məktəbini, 1995-ci ildə Sankt-Peterburq Mülki Aviasiya Akademiyasını bitirmiş, Bakı şəhər sakini Muxtarov Bayram Cankişi oğlu "AzPolitika.info" saytı vasitəsilə ölkə rəhbərliyinə müraciət edib. O, 1991-ci ildə Zabrat aviasiya dəstəsinin rəhbərliyi tərəfindən göstərdikləri şücaətə görə onun və pilot  yoldaşının dövlət tərəfindən təltif edilmələrinə dair Nazirlər Kabinetinə göndərilmiş, ancaq orada itmiş təqdimatın bərpa edilməsinə kömək göstərilməsini xahiş edir. B.Muxtarovun müraciətini qısa ixtsar və zəruri redaktə ilə təqdim edirik:

"Sizə müraciət edən 18 mart 1962-ci ildə Bakı şəhərində anadan olmuş, 1983-cü ildə Sasov təyyarəçilik məktəbini, 1995-ci ildə Sankt-Peterburq Mülki Aviasiya Akademiyasını bitirmiş Muxtarov Bayram Cankişi oğludur. Ailəliyəm. İki övladım var. Böyük oğlum Muxtarov Fərid Zabrat aeroportunda stajor-pilot, kiçik oğlum Muxtarov Rüfət Hərbi Hava Qüvvələrində avia-mexanikidir.

1983-cü ildən Zabrat aeroportunda pilot kimi əmək fəaliyyətinə başlamışam. 1989-1995-ci illərdə, müharibə başlayanda və sonralar Qarabağa və Ermənistan respublikası ilə sərhəd olan rayonlara Mİ-8 helikopterində 400-dək xüsusi tapşırıqlı uçuşlar etmişəm. 1991-ci il iyulun 20-si Goranboy rayonunun Todan kəndi üzərində növbəti döyüş uçuşu zamanı mühasirəyə düşmüş polis dəstəsini xilas edərkən erməni snayperi tərəfindən başımdan güllə yarası almışam. Gəncə şəhəri Təcili Tibbi Yardım xəstəxanasında (Arayış №4322) və sonra Bakı şəhəri M.İ.Qədirli xəstəxanasında (epikriz: 31.07.1991) müalicə almışam.

Sağalandan sonra işimə qayıtmışam. Yaralanarkən yanımda o zamankı Daxili İşlər nazirinin müavini, general-mayor Ramiz Məmmədov, sonradan Müdafiə naziri olmuş Dadaş Rzayev, Qarabağ Xalq Yardımı komitəsinin nümayəndəsi Cümşüd Nuriyev, jurnalist Vahid Mustafayev və başqaları var idi. Yaralanma anının videogörüntüləri youtube.com portalında var.

Müəllifi Azərbaycan Elmlər Akademiyasının aparıcı elmi işçisi, tarix elmlər doktoru, hərbi aviasiya polkovniki Rizvan Zeynalov olan “Azərbaycanın Milli Qəhrəmanları” kitabında da mənim haqımda yazılıb. Sitat: “Bir dəfə yaralı döyüşçüləri daşıyarkən güclü atəşə məruz qalan vertalyot zədələnmiş, ikinci pilot Bayram Muxtarov yaralanmışdı. Buna baxmayaraq, K.A.Abbasov uçuşu davam etdirmək qərarı verdi. Elə bu an ermənilər raket buraxdılar, amma Abbasovun zədəli vertalyotla etdiyi aldadıcı manevr nəticəsində raket hədəfə dəyməyib yan keçdi”( səh.126.).

Qeyd edək ki, mütəxəssislər vertalyotun raketdən yayındırılmasının pilotdan yüksək peşəkarlıq tələb etdiyini bildirirlər. Bayram Muxtarov və Kazım Abbasov düşmənin güclü atəşinə məruz qalan vertalyotu ermənilərin buraxdığı raketdən də yayındırmaqla, həm də içərisində bir general, bir polkovnik olmaqla, 23 nəfərin həyatını xilas  ediblər. Təkcə bu fakt onların dövlət tərəfindən yüksək formada təltif edilməsinə əsas yaradır. 1991-ci ildə Zabrat aviasiya dəstəsinin rəhbərliyi, heyətin göstərilmiş şücaətə görə dövlət təltifi təqdimatını Nazirlər Kabinetinə göndərib. Ancaq məlum olmayan səbəblərdən sənədlər it-bata düşüb (1991-1992-ci illər).

B.Muxtarov daha sonra yazır: "2015-ci ildən bəri bir neçə dəfə Nazirlər Kabinetinə və Prezident Administrasiyasına müraciət etmişəm. Onlara xatırlatmağıma baxmayaraq ki, Müdafiə Nazirliyi 1991-ci ildə hələ yaradılmamışdı, hər dəfə məktublar Müdafiə Nazirliyinin Təltifetmə şöbəsinə yönəldilir və onların arxivində təltif haqda sənədin olmadığı bildirilir. Hal-hazırda Milli Aviasiya Akademiyasında müəllim vəzifəsində çalışıram. Kazım Abbasov isə Zabrat aeroportunda “uçuş heyatinin metodiki işi üzrə mühəndis” vəzifəsində çalışır.

Sizə müraciət edərək, vaxtı ilə heyət üzvlərinin adına yazılmış təltifin bərpa olunmasına yardımçı olmağınızı xahiş edirəm.

Hörmətlə Bayram Muxtarov (Tel: 070-342-46-49)".