MALİYYƏ BAZARLARINA NƏZARƏT PALATASI LƏĞV EDİLDİ - Sərəncam

Prezident İlham Əliyev "Maliyyə xidmətləri bazarında tənzimləmə və nəzarət sisteminin idarəedilməsinin təkmilləşdirilməsi haqqında" sərəncam imzalayıb.

"Report" xəbər verir ki, sərəncamla Azərbaycan Respublikasının Maliyyə Bazarlarına Nəzarət Palatası ləğv edilib və Azərbaycan Respublikasının qanunlarında maliyyə bazarlarına nəzarət orqanının müəyyən edilmiş səlahiyyətləri, o cümlədən onun maliyyə xidmətləri bazarında lisenziyalaşdırma, tənzimləmə və nəzarət, investorların və maliyyə xidmətləri istehlakçılarının hüquqlarının qorunması sahəsində vəzifə və hüquqları, habelə əmlakı Azərbaycan Respublikasının Mərkəzi Bankına verilib.

Sənədə əsasən Mərkəzi Bank bir ay müddətində “Azərbaycan Respublikasının Mərkəzi Bankı haqqında”, “Banklar haqqında”, “Bank olmayan kredit təşkilatları haqqında”, “Sığorta fəaliyyəti haqqında”, “Qiymətli kağızlar bazarı haqqında”, “Valyuta tənzimi haqqında” qanunlarında və digər qanunvericilik aktlarında zəruri dəyişikliklərin edilməsi barədə təkliflərini hazırlayıb Prezidentə təqdim etmək, müvafiq təhvil-təslim işlərinin həyata keçirilməsi üçün bütün zəruri tədbirləri həyata keçirmək tapşırılıb.

Nazirlər Kabineti isə bu sərəncamdan irəli gələn digər məsələləri həll edəcək.

Şərhlər

sual 2019-11-28 18:56:27

Palata yaranandan artıq sonu bəlli idi. Maraq doğuran digər qurumun taleyidir – baş nazirin rəhbərliyi altında fəaliyyət göstərən “Maliyyə sabitliyi şurası”-nın. Komissiyanın son 3 ildəki fəaliyyəti aydın göstərir ki, qurumun formalaşmış institusional strukturu təkmilləşdirilməlidir. Ölkədə makro-maliyyə sabitliyinin qorunmasına konkret məsuliyyətli (cavabdehliyi olan) bir qurum müəyyənləşməlidir. Belə qurumun olmaması isə adi, sıravi riskin aradan qaldırılmasını problemə çevirir və bununla bağlı maliyyə sektorunda geniş müzakirələrə yol açır (məsələn, bank sektorunda verilmiş istehlak kreditlərinin səviyyəsi barədə son dövr aparılan aktiv müzakirələr)

Son yazılar