“Cahangir Əsgərov hazırda məzuniyyətdədir, qayıdan kimi onunla görüşəcəm və bu problemi onun diqqətinə çatdıracam“
Modern.az xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında deputat Vahid Əhmədov deyib.
Vahid Əhmədov AZAL monopoliyada ittiham edib.
“Azərbaycan aviasiyası, hava nəqliyyatı ilə bağlı tənqidi fikirlərimi, iradlarımı dilə gətirmək istəyirəm. Bununla bağlı, ümumiyyətlə, son illər çoxlu tənqidlər, iradlar səsləndirilir. Bu günlərdə özümün şahidi olduğum bir hadisədən danışmaq istəyirəm. Ötən ilin sonlarında yoldaşımla Türkiyəyə getmişdik, özü də biznes-klassla. Sonra elə oldu ki, iki gün gecikəsi oldum. AZAL-ın Türkiyədə nümayəndəliyi var, ora müraciət edəndə dedilər ki, bizlik deyil, biz biletləri dəyişə bilmərik, haradan almısınız, orada da müraciət edin…
Bu nə deməkdir, nə özbaşınalıqdır? Bütün bunlar AZAL-ın monopolist olmasından irəli gəlir. Çünki başqa şirkətlər Azərbaycanın hava nəqliyyatına, hava məkanına buraxılmır. AZAL hər şeyi inhisarında saxlayır, nəticədə də bu cür problemlər, narazılıqlar yaşanır”-deyə Vahid Əhmədov əlavə edib.
Azərbaycan Mülki Aviasiya Administrasiyasının direktoru Arif Məmmədov da problemi AZAL-ın rəhbərliyinə, Cahangir Əsgərova çatdıracağını bildirib.
"Azərbaycanda aviasiya monopoliyadadır, rəqabət mühiti yoxdur. AZAL Azərbaycan dövlət büdsəsinə ağır yükdür. Onun özəlləşdirilməsi istiqamətində addımların atılması vacibdir”. “Report”un verdiyi xəbərə görə, bunu “Aviasiya haqqında” qanuna dəyişikliklər edilməsi haqqında qanun layihəsinin bu gün Milli Məclisin İqtisadi siyasət, sənaye və sahibkarlıq Komitəsinin bugünki iclasında müzakirəsi zamanı deputat Əli Məsimli bildirib.
Dövlət Mülki Aviasiya Administrasiyasının direktoru Arif Məmmədov inhisarçılıqla bağlı səslənən fikirlərə cavab olaraq bildirib ki, Azərbaycanda uçuşların 52%-i xarici şirkətlər, 48%-i isə AZAL tərəfindən həyata keçirilir.
O, ümumilikdə 68 dövlətlə uçuşların yerinə yetirilməsi haqqında saziş imzaladıqlarını, lakin cəmi 22 dövlətlə hava əlaqərinin olduğunu vurğulayıb.
A.Məmmədov həmçinin AZAL-ın qiymətlərini baha olması ilə bağlı səslənən fikirlərə cavab verib: “AZAL tərəfindən uçuşun xərcləri yığılmırdı. AZAL beynəlxalq praktikadan istifadə edərək, müxtəlif qiymətlə uçuşlar təqdim edir. AZAL büdcəyə ağır yük olduğu halda belə, yetərli yığım yoxdur”.
Şərhlər