Şəkərli diabetin kəskin formasından əziyyət çəkən hüquq müdafiəçisi Leyla Yunusun uzun müddət həbsdə saxlanması və pəhriz yeməkləri, dərmanla təmin edilməməsi ağır nəticələrə səbəb ola bilər.

Həkim Azad İsazadə "Turan"-ın müxbiri ilə söhbətində təcridxanada hüquq müdafiəçisi üçün yemək qəbulundan imtina ilə bağlı bildirib: "Penitensiar xidmət bunu onunla izah edir ki, yalnız yaxın qohumlar yemək və dərman gətirə bilər.

Leyla Yunusa dərmanı həyat yoldaşı Arif Yunus aparırdı. İndi o da həbs olunub.

Şəkər xəstələri təmiz havada və daim hərəkətdə olmalıdırlar. Təcridxanada bunlar yoxdur. Pəhriz və dərmanın olmaması Leyla Yunusun vəziyyətini ağırlaşdıra bilər, hətta komaya düşə bilər.

Əgər xəstə dərman qəbul edirsə, lakin xüsusi qidanı yemirsə bu, qanda şəkərin kəskin artmasına ya da azalmasına səbəb ola bilər ki, hər ikisi eyni dərəcədə təhlükəlidir.

Leyla Yunusla bağlı ən optimal vəziyyət onun barəsində həbs-qətimkan tədbirinin dəyişdirilməsi olardı... Əgər bu, mümkün deyilsə, onun yaxın dostlarının yemək və dərman gətirməsi üçün şərait yaradılmalıdır".

Həkimin sözlərinə görə, cümə günü baş prokuror Zakir Qaralovun adına müvafiq xahişlə müraciət edilib.

Arif Yunusun vəziyyətinə gəlincə, həkim deyir ki, o da həyəcan doğurur: "Son həftələr iki dəfə hipertonik böhran keçirib, sol əlində iflicin yüngül formasının əlaməti var".

A.İsazadənin sözlərinə görə, hipertoniya xəstələri qan təzyiqinə daim nəzarət etməli, müntəzəm dərman qəbul etməlidirlər.