PUTİN "KOMPROMİS" DEDİKDƏ NƏYİ NƏZƏRDƏ TUTURDU? - "4 ildən sonra rusiyalı hərbçilər Qarabağı tərk etməlidirlər..."

Rusiya Prezidenti Vladimir Putinin vasitəçiliyi ilə Azərbaycanla Ermənistan arasında 10 noyabr və 11 yanvar bəyanatları qəbul edildi. Kreml müharibəni noyabrın 9-da dayandırmaqla Ermənistanı və Qarabağdakı erməni separatçılarını daha ağır məğlubiyyətdən xilas etdi. Rusiya yeganə ölkədir ki, bu ölkənin Prezidentinin dəvətiylə həm Ermənistanın Baş naziri, həm də Azərbaycanın Prezidenti Moskvada müzakirə aparmağa hazırdırlar. Kreml sahibi də bu mövqeyindən istifadə edir.

Ermənistanda parlament seçkisinin nəticəsi bəlli olduqdan sonra qələbə çalan Nikol Paşinyan Moskvaya dəvət edildi və Rusiya Prezidenti Vladimir Putinlə işçi görüş keçirildi. Vladimir Putin balansı pozmasın deyə bu dəfə Azərbaycan Prezidenti İlham Əliyevi Moskvaya işgüzar səfərə dəvət etdi. İlham Əliyev iyulun 20-də Putinlə görüşdü.

Qurban bayramı münasibətilə İlham Əliyevi təbrik edən Vladimir Putin gələn il iki ölkə arasında diplomatik münasibətlərin qurulmasının 30 illiyini qeyd edəcəklərini xatırlatdı. İqtisadi münasibətlərdən məmnun qaldığını deyən Kreml sahibi, bölgə ilə bağlı fikirlərini belə ümumiləşdirdi: “Aydındır ki, regionda vəziyyətin nizamlanması ən mühüm məsələlərdən biri olaraq qalır. Əlbəttə, bilirəm ki, Siz bu məsələyə çox böyük diqqət və əhəmiyyət verirsiniz. Buna görə Sizə təşəkkür etmək istəyirəm ki, kompromisli qərarlar tapılır. Onlar həmişə ən mürəkkəb məsələlərdir, lakin əgər biz nizamlama istəyiriksə, - biz hamımız isə bunu istəyirik, - onda bu yolla getməliyik. İndiyə qədər biz bunu etməyə nail olmuşuq, buna görə Sizə təşəkkür etmək istəyirəm”.

Vladimir Putin “kompromisli qərarlarla” bağlı Əliyevə təşəkkür etməklə, nə demək istədi? 

Söhbət hansı kompromislərdən gedir? Azərbaycanın ən böyük kompromisi odur ki, müharibədə məğlub olan Ermənistana sülh sazişini qəbul etdirmək üçün İrəvana təzyiqi artırmır. Qalib kimi tələblərimizin siyahısı bəllidir: Laçın dəhlizi nəzarətimizə keçməli, Qarabağdakı separatçılar tərksilah olunmalı, Qazaxın -7, Naxçıvanın – 1 kəndi Azərbaycana qaytarılmalı, Zəngəzur dəhlizinin işə düşməsi üçün addımlar atılmalıdır. Azərbaycanın bir başqa kompromisi odur ki, atəşkəsi pozan – Ağdama, Şuşaya, Kəlbəcərə, Tovuza atəş açan Ermənistanı “dəmir yumruq” əməliyyatını davam etdirməklə cəzalandırmır. Nikol Paşinyan razılaşmaların əksinə olaraq nəqliyyat dəhlizinin açılmasını da yubadır. Ona görə də Kreml sahibi anlamalıdır ki, Azərbaycan üçün “kompromisin” limiti var.

İlham Əliyev cavab nitqində bölgədəki vəziyyətlə bağlı Putinə bunları dedi: “Əlbəttə, regionda münaqişədən sonrakı vəziyyət mövzusu da var. Bu məsələyə daimi diqqətinizə, çox vacib və həssas məsələlərin həllində şəxsən iştirakınıza görə Sizə təşəkkürümü bildirmək istərdim. Biz Sizinlə daim əlaqə saxlayırıq. Hərbi əməliyyatlar başa çatandan sonra ötən səkkiz ay ərzində, zənnimcə, yanvar ayında Moskvada şəxsən görüşümüz və telefon söhbətlərimiz vəziyyətin sabitləşdirilməsi işində çox mühüm rol oynayıb. Biz qətiyyətlə münaqişədən sonrakı dövrün maksimum ağrısız keçməsi əzmindəyik. Düşünürəm ki, ümumi səylərimizlə buna nail olacağıq”.

Bu abzas o deməkdir ki, Vladimir Putin Nikol Paşinyana imzalatdırdığı bəyanatların yerinə yetirilməsini təmin etməlidir. İlham Əliyev bu abzasda bir neçə dəfə “münaqişədən sonrakı dövr” ifadəsini işlədib. Azərbaycan üçün münaqişədən sonrakı dövr sülh sazişinin imzalanması, Ermənistan tərəfindən Azərbaycanın ərazi bütövlüyünün tanınması, sərhədlərin müəyyənləşməsi və Qarabağdakı fəaliyyətimizin davamı deməkdir. 

İlham Əliyev Vladimir Putinlə qapalı görüşdə böyük ehtimalla ona Qarabağda aparılan quruculuq işləri barədə məlumat verib və Rusiya şirkətlərini də bölgədəki çalışmalara dəvət edib. Ancaq bir ölkə ki, səfirinə Şuşaya getməyi qadağan edib, həmin ölkənin rəhbərliyinin şirkətlərinə işğaldan azad edilmiş bölgələrdə fəaliyyətə yaşıl işıq yandıracağını gözləmək yersizdir. Əsas odur ki, Rusiya bizə Ermənistanla sərhədi müəyyənləşdirməyə mane olmasın. 

Növbəti hədəfimiz isə Qarabağın tamamında qayda-qanun yaratmaq olacaq. Bunu bölgədə yerləşən rusiyalı hərbçilər etməyəcəklər, özümüz edəcəyik. Kreml sahibi heç şübhəsiz Azərbaycan Xarici İşlər Nazirliyi ilə Müdafiə Nazirliyinin bəyanatlarında “Azərbaycan ərazisində müvəqqəti yerləşən Rusiya sülhməramlı qüvvələri” ifadələriylə tanışdır. Bu məsələdə kompromisin limiti bizim üçün 5 ildir, 1 ili başa çatmaq üzrədir, 4 ildən sonra rusiyalı hərbçilər Qarabağı tərk etməlidirlər. Buna həm özümüz, həm də Moskva hazır olmalıdır.

Elxan Şahinoğlu,

“Atlas” Araşdırmalar Mərkəzinin rəhbəri

635x100

Şərhlər

Saf azərbaycanlı 2021-07-22 11:01:13

Ermənistan RF hesabına da tam müdafiə olunur! Azərbaycanda törətdikləri 30 illik hərbi terror cinayətinə görə də AzAliKon Məhkəməsi də heç iddia ilə mühakimə də olunmayıb? Tarixin yerli əhaliyə qarşı hərbi soyqırım cinayətini onlara bağışlanır???

Əski Xankəndli 2021-07-21 21:51:08

Bakı Avropaya qırx milyardlıq qaz borusu çəkdirdi! Hərbi işğalçı Ermənistan cinayətinə iddia olmamasından istifadə edərək, yeni quyruqla Aİyə üzv oldu! Rəsmi Bakı aşkar münasibəti qabartmadı? Azərbaycan vətəndaşlarının haqları itirilir, Avropa qazanır!? İndi, 2,6 mlrdı qabarrtmaq məcburundayıq! Cinayətə iddia isə yenə səslənmir?

Roma 2021-07-21 13:37:09

Avropa İttifaqı ermənistana 2.6 milyard avro, bizə 0.14 milyard avro, pul ayırır quruculuq bərpa işlərinə. Əhalisi və ərazisi bizdən 3-4 dəfə az olan və ərazisinə bir güllə belə düşməyən erməniyə o boyda vəsait onun hərbi gücünün bizi üstələməsinə yönəldilir. Ərazisi dağıdılmış Azərbaycan isə geri qaytardığı torpaqların bərpasına milyardlar lazımdır ki, bu da necə deyərlər çox çətin bir məsələdir...

t.ədalət 2021-07-21 11:03:47

Heç bir sülh müqviləsi olmayacaq.Müharibənin dirijoru Putindir.Ərdoğanın müdaxiləsi Putinin planını bir az uzatdı."qərbi" və "şərqi" olmaqla zəngəzur elan edilən Azərbaycan rayonları Zəngilan,Qubadlı,Laçın və Kəlbəcər Putinin arzuladığı kimi yeni bir "Dağlıq Qarabağ" olacaq.Yəni rus ordusu bu regionu asanca özününküləşdirib,həm ermənistanı,həm də Azərbaycanı tələyə salacaq.Qarşıda Putinin hazırladığı çox dərin bir bataqlıq var.Həmin bataqlıqdan çıxmaq üçün yüz il azlıq edəcək.

Son yazılar