"AzPolitika.info" xəbər verir ki, "kriminalqafqaz"-ın istintaq materiallarından əldə etdiyi məlumata görə, V.Səfərli ifadəsinə başlayarkən 2009-cu ildə onlara verilən ofisin əlverişsiz olduğunu deyib: “2009-cu ildə Kütləvi İnformasiya Vasitələrinin İnkişafına Dövlət Dəstəyi Fondu yaradıldıqdan sonra “İçərişəhər” metrostansiyasının yaxınlığında yerləşən sahəsi kifayət qədər kiçik mənzildə fəaliyyət göstərməyə başladıq. Ondan əvvəl bizə Fondun yerləşməsi üçün Əmlak Məsələləri üzrə Dövlət Komitəsi tərəfindən şifahi olaraq 8-ci km qəsəbəsində zirzəmidə yerləşən məkan təklif edildi. Təklif olunan həmin yer Fondun fəaliyyəti üçün münasib olmadığına görə oraya yerləşməkdən imtina etdik.
“İçərişəhər” metrostansiyasının yaxınlığındakı yer də bizə uyğun deyildi və əməkdaşlarımızın işləməsi üçün kifayət qədər yer yox idi. Buna görə də, mən 2011-ci ildə Prezidentin köməkçisi və Fonda kuratorluq edən Əli Həsənovla məsləhətləşdikdən sonra Fondun fəaliyyət göstərməsi üçün münasib məkan axtarmağa başladım. Bu dəfə də Əmlak Məsələləri üzrə Dövlət Komitəsinə şifahi və yazılı müraciət etdim”.
Vüqar Səfərli ifadəsində qeyd edib ki, daha sonra Əli Həsənovla görüşərək bu barədə danışıb: “Kuratorumuz Əli Həsənovun otağında onunla danışanda o, özünə məxsus olan Bakı şəhəri, Yasamal rayonu, Mətbuat prospekti 23L ünvanında yerləşən binada yer təklif etdi. Həmin bina əvvəllər “Azərmətbuatyayımı” ASC-nin balansında olub. “Azərmətbuatyayımı” ASC-ni təsis edən müəssisə isə “Kaspi Az” MMC-dir. Həmin MMC-nin təsisçisi, yəni sahibi kuratorumuz Əli Həsənovun həyat yoldaşı Sona Vəliyevadır. Mən Əli Həsənovun təklif etdiyi bina ilə tanış olduqda Fondun fəaliyyəti üçün münasib yer olduğunu gördüm. Həmin binanın Əli Həsənovun ailəsinə məxsus olduğuna görə yox, şəraiti və yerləşmə yeri münasib olduğuna görə üçüncü mərtəbədə yerləşən 371 kvadratmetr sahəni rəsmi müqavilə ilə icarəyə götürdüm”.
V.Səfərli bildirib ki, müqaviləni özü Fondun icraçı direktoru kimi “Azərmətbuatyayımı” ASC ilə bağlayıb: “Həmin binada icarəyə verilən sahəyə ödənilən məbləğ hər ilin büdcəsi formalaşdırıldıqda Maliyyə Nazirliyi ilə razılaşdırılırdı. Maliyyə Nazirliyi heç vaxt ödənilən məbləğin normalara uyğun olmaması barədə Fonda irad bildirməyib. 2019-cu ildə ilkin bağlanmış icarə müqaviləsinə dəyişiklik edilərək əvvəllər həmin binada yerləşən “Bilik Fondu”ndan boşalan ikinci mərtəbədəki 421 kvadratmetrlik sahəni də icarəyə götürdük. Həmin müqaviləni Əli Həsənovun oğlu Şamxal Həsənovla bağladım. Çünki həmin bina rəsmi qaydada Şamxal Həsənovun adına keçirilmişdi.
Əlavə 421 kvadratmetrlik sahənin icarəyə götürülməsini mənə Əli Həsənov tapşırdı. Hətta məsələdən Prezident Administrasiyasının rəhbəri Ramiz Mehdiyevin də məlumatlı olduğunu dedi və göstəriş verdi ki, Ramiz Mehdiyevin adına bu barədə məktub ünvanlayım. Əli Həsənovun dediyinə görə, həmin yeni icarəyə götürülən sahədə internet bloqerləri oturaraq fəaliyyət göstərməli idi. Həqiqətən də bir neçə bloqer həmin otaqlarda oturaraq qeyri-rəsmi formada fəaliyyət göstərirdilər”.
Şərhlər
V.Səfərli külli miqdara rüşvət alaraq A.Əsədov adlı bir çobana ev verdi.
Uşaq pulu vermeye pensiyaları artirmaģa pullari yoxdur amma Əli Həsənova ailə biznesini qurmaqdan ötrü trol dəstesi saxlamaq adı ilə 50 milyon verə bilirdilər. Bu böyuk məbləģin hesabatı alınmayıb görunür ki...
Axı nəyə göre illərlə bu işlərin başında duran Əli Həsənov hələ də Türkiyədə biznesini idarə edir. Oģlu da Dubay biznesini. Faizlə işləyən Vüqar və digerləri isə həbsə atılır. Nəyə görə Əli ilə oģlu Şamxal kef edirlər?! Bəs onlar nə vaxt etdiklərinin cavabını alacaqlar?
Vaxtı ilə Əli Həsənovun trolluģunu yerinə yetirən bahalı maşınlar süren, bahalı ofislərdə oturan, qht-lərə qrant almaqda dəllallıq edən şərəfsiz qht sədrlərinin görəsən vəziyyətləri necedir?
Çox doģru yazirsiniz. Bir de o vaxt Əlinin ailəsi ilə nə oyundan çıxdıģından xəbərləri məgər yox idi?
371m2 +421m2=792m2, bir binadan bu qədər sahə bir ailəyə məxsusdur, yəni Əli Həsənovun ailəsinə və bu sahəni də ailə verir icarəyə azı 5-10 min manat aylıq icarə haqqını da alıb aız şirinliyiynən yeyirlər, o qədər Əlidən, həyat yoldaşından oğlundan savadlı qabiliyyətli insanlar qalıblar iş axtara-axtara, deyərdim ki, lap yavan çörəyə möhtacdırlar...Bax bu da suverenlik, sosial bərabərlik və s., biri yəni Əli Həsənov toxundan gəyirir, mənim kimisinin isə acından qarnı curuldayır...