ÜÇÜNCÜ QARABAĞ SAVAŞINA HAZIRLIQ GEDİR? - Rəsmi şəxsdən maraqlı eyham
"Hesab edirəm ki, əlillərimizin ruhdan salınması və intihara sürüklənəcək qədər motivasiya edilməsi qəsdən yürüdülən siyasətdir və nə yazıq ki, bu məsələdə bir sıra müxalif qüvvələrlə yanaşı hakimiyyətdəki 5-ci kolonun nümayəndələri də birgə fəaliyyət göstərirlər. Daha açıq deyəcəyəm; Azərbaycanda 5-ci kolonla bəzi müxalif qüvvələr dövlətçiliyimizə qarşı ittifaq qurublar. Niyyətləri isə Azərbaycanın 3-cü Qarabağ döyüşlərində məğlubiyyətinə nail olmaqdır...”
“AzPolitika.info” xəbər verir ki, bunu Milli Məclisin sədr müavini Adil Əliyev mətbuata açıqlamasında bildirib.
Əslində, belə bir hərbi əməliyyatın labüdlüyü dəfələrlə bir çox politoloqlarımız və hərbi ekspertlər tərəfindən də səsləndirilib. Çünki Ermənistan 10 noyabr sazişinin, nə də sonrakı görüşlərdə əldə olunan razılaşmaların əhəmiyyətli bir qismini yerinə yetirməkdən imtina edir. Xüsusilə də öz silahlı qüvvələrini Qarabağdan çıxarmaq niyyətində olmadığını göstərir və bu işdə ona əsas havadarı olan Rusiyanın dəstək verdiyi qətiyyən şübhə doğurmur.
Bütün bunlar isə Azərbaycanı vəziyyətə uyğun adekvat addımlar atmağa vadar edə bilər və məsələnin hərbi yolla həlli üçün rəsmi Bakının bütün hüquqi əsasları var.
Bunu ölkə başçısı İlham Əliyev də son çıxışında demək olar açıq şəkildə ifadə edib: “Biz Rusiyanın hərbi rəhbərliyi qarşısında bu məsələni qaldırmışdıq və bir neçə ay bundan əvvəl Rusiyanın Müdafiə Nazirliyinin yüksəkvəzifəli şəxsi Azərbaycanda səfərdə olarkən bizim Müdafiə Nazirliyinə söz vermişdi ki, iyun ayına qədər erməni silahlı birləşmələri Qarabağdan çıxarılacaq. Ancaq bu gün artıq iyulun ortasıdır, bu məsələ öz həllini tapmayıb. Ermənistan 10 noyabr Bəyannaməsinə zidd olaraq bu öhdəliyi yerinə yetirmir. Rusiya sülhməramlıları - Rusiya tərəfi də 10 noyabr Bəyannaməsini imzalayıb - necə deyərlər, onları buna məcbur etmir. Əlbəttə ki, bu, dözülməz vəziyyətdir. Çünki erməni silahlı birləşmələrinin Azərbaycan ərazisində qalması tamamilə qəbuledilməzdir. Biz qalib ölkəyik, biz öz ərazi bütövlüyümüzü bərpa etmişik. Əgər Ermənistan Azərbaycan ərazisindən öz silahlı birləşmələrini çıxarmaq istəmirsə, onda bizə bunu açıq desin, biz də işimizi bilək. Bizim cavabımız nə olacaq? Onu bəlkə də indi demək yersizdir. Ancaq bu, 10 noyabr Bəyannaməsinin kobudcasına pozulması deməkdir...”.
C.Məmmədov
“AzPolitika.info”
Şərhlər
İcra müavini vəzifədə qalmaq üçün rusca danışır! Kim, kimi tutacaq? Otuz beş il anti-konstitusion Qarabağ soyqırım terroru cinayətlərindən neçəsi mühakimə olunub? Dövlətin bütün öz ərazisində səlahiyyətlərini icra etməsinin özgə MNnə və ya Sülhməramlıların işinə nə dəxli?
Anladiq, 5 ci kalon var, Be niye arashdirib , tutmursuz ?
Onzuz da Vətəni həmişə kasıb-kusub qoruyub,həmişə də kasıb-kusub qoruyacaq.Yəni Sabirabadın o harın başçısı tipindən olan qudurğan məmurcuqların ikrahla baxdığı qara camaat.Müharibə vaxtı səsləri qısılmışdı o tipli məmurcuqların.Müharibə bitəndən sonra bir neçə ay keçdi,yavaş-yavaş yenə əda ilə danışmağa başladı bəziləri.Camaatdı da,vur qapazı başına,al çörəyi əlindən.İlk olaraq heç bir səbəb olmadan Azərsu suyun qiymətini ikiqat qaldırdı,camaat zəfərin coşqusunu bitirməmişdi hələ,qolu qanadı qırıldı elə bil hamının.Amma yavaş-yavaş artıq qaziləri də saymamağa başladılar.Anlamadılar ki,yetim-yesirin malını aşkar-gizli yeyə bilərsən,amma savaşda can qoyan qazilər sənə haqqını yedirməz.Çünki qazilər bütün ordu deməkdir.Bütün Azərbaycan ordusu qazidir.Qazinin haqqını tapdalayarsan,bütün ordu incik düşə bilər,deyər ona edildi,ya bizə edildi,nə fərqi,biz də onun kimi bir əsgər.O məmurcuqlar anlamadılar ki,düşmənə kabinetlərdə yox,döyüş meydanında qalib gəlirlər.Əksini düşünən məmur varsa növbəti savaşda məmur batalyonu yaradıb bir idarədəncə düşmənlə savaşsınlar...