Rusiyanın sabiq prezidenti və hazırda Təhlükəsizlik Şurası katibinin müavini vəzifəsini daşıyan, əsl vəzifəsi isə Putinin məlum səbəblərdən dilinə gətirə bilmədiyi bütün pislikləri öz sosial şəbəkə səhifəsində paylaşmaq olan Dmitri Medvedev daha bir çirkin paylaşım edib.

Tramp-Putin telefon danışığının Ukraynanı və Avropanı bölüşdürməyə xidmət etdiyini gizlətməyən Medvedev yazıb: "Menyuda yüngül qəlyanaltılar - Brüssel kələmi, Britaniya balıq və çipsləri və Paris xoruzudur. Əsas yemək Kiyev kotletidir. Nuş olsun!"

Zelenski cavabında Ukraynanın “menyudakı yemək olmadığını” deyib. Rusiya Xarici İşlər Nazirliyinin “bomjsifət” rəsmi nümayəndəsi Mariya Zaxarova isə Zelenskiyə cavab olaraq deyib ki, Ukrayna hakimiyyəti “yeməyin həzmdən sonra çevrildiyi halıdır”. Bu da müasir Rusiyanın dövlət ərkanı, dövlət əxlaqı, mədəniyyəti, dövlət dili…

Boyu, ədası, beyni ilə Putinin əkiz tayı olan Medvedevin bu paylaşımı bir daha Rusiyanın miskin imperiya təfəkkürünün, siyasətinin, iştahının, iddiasının həyasızlığına görə sərhəd tanımadığını göstərir. Hər şeyə yemək, qarın prizmasından baxan, qana susamış medvedevlər, zaxarovalar, lavrovlar, zatulinlər və digərlərindən ibarət bu “əyyaş sürüsü” bütün ətraf ölkələrə, xalqlara da heç şübhəsiz, Ukraynaya baxdığı gözlə baxırlar.


Görəsən, bizdəki rusbaşlar bu çıxışlardan, paylaşımlardan, mesajlardan nəticə çıxarırlarmı? Qanırlarmı ki, bu gün Ukraynanı “Kiyev kotleti” kimi görən bu metryarımlıq siyasi həşəratlar Azərbaycanı da həmişə, məsələn, dolma, piti kimi görüblər və görürlər… Amma nə olsun? Azərbaycanda bir çoxları bu dili - ağzından söyüş, zibil, üfunət yağan Medvedev, Zaxarova kimilərin dilini göylərə qaldırırlar, rus dilində təhsili, rus mədəniyyətini, dünyagörüşünü müdafiə edirlər. İndi deyəcəklər ki, rus dili təkcə zaxarovaların yox, həm də Dostoyevskinin, Çexovun, Tolstoyun, Puşkinin dilidir. Bunları da az gözümüzə soxun! Bu yazının müəllifi də daxil omaqla, Dostoyevskini orijinaldan oxuyan, anlayan, rus dilinin az qala öz dili kimi bilən bir azərbaycanlı qətiyyən həmin Dostoyevskini ingilis, alman, fransız dilində tərcüməsini oxuyan avropalıdan daha xoşbəxt, daha savadlı, daha varlı və ağıllı deyil! 

Dostoyevskini orijinaldan oxumaq kimisə xoşbəxt və mədəni etsəydi, birinci növbədə elə rusları edərdi! Bu yazıçıların öz ana dilində danışan rusların güzəranı göz qabağındadır. Onların yazıb-yaratdıqları dövrlə müqayisədə heç nə dəyişməyib, hələ də ruslarınböyük hissəsi kanalizasiyasız, zibillik dolu bataqlıqlarda yaşayır, hələ də nə sivil dövləti, nə azad cəmiyyəti, nə də normal ailə institutu var. Korrupsiya, saxtakarlıq, talançılıq, yalan, məddahlıq, ədalətsizlik, sosial təbəqələşmə və s. də öz yerində…

Azərbaycandakı rus dili və rus dünyası aşiqləri Ukraynanın şərqində işğal olunmuş şəhərlərə, kəndlərə nəzər yetirsələr, bəlkə də olmayan beyinlərində nəsə dəyişər. “Rus dünyası” buralara ölüm, dağıntı, diktatura, yoxsulluqdan başqa heç nə gətirməyib. Rusiya hətta Donetsk, Luqansk və digər Ukrayna regionlarında yaşayan, öz dilindən, dinindən olan rusları da “ikinci sort” kimi qəbul edir, onları aşağılayır, təhqir edir, müharibədəki “ət maşını”na da ilk növbədə onları göndərir…

Azərbaycandakı ən aktiv “rusbaşların” böyük əksəriyyəti rus dilini elmi səviyyədə bilmirlər, ya rus məktəbində oxuduqları, ya bir müddət Rusiyada yaşadıqları, ya da Bakıda qonum-qonşudakı ruslarla öz dilini qoyub, zıqqana-zıqqana rus dilində danışdıqları üçün bu dili pis-yaxşı öyrənə biliblər. Yəni, bu dili zəhmət çəkib gecə-gündüz oxumaqla öyrənməyiblər. Yalnız rus dilini bilməsinin sayəsində “adam olduğunu” deyən Ayaz Salayev kimilər piylənmiş beyinlərini tərpədib ingilis, alman, fransız dilini öyrənmədikləri üçün bu gün rus dilinin odlu-alovlu müdafiəçiləri kimi çıxış edirlər. Belə çıxır ki, rus dilini bilməyən azərbaycanlı savadlı, bilikli ola bilməz?

Azərbaycan Konstitusiyası deyir ki, dövlət dilimiz Azərbaycan dilidir! Vəssalam! Bu adamlar nəyin mübahisəni edir, hansı hüquqla, hansı qanunla rus məktəbini, rus dilini müdafiə edir, bilmək olmur.

Elə bu cür “rusbaşların” sayəsində 35 ildir rusdan ayrılan Azərbaycan cəmiyyəti hələ də natamamlıq kompleksi yaşayır, özünə qayıda, özünü tanıya, tam mənada ÖZÜ ola bilmir.

Rus dilinin elmə, ədəbiyyata yol açdığını deyənlər bu dilin elmdən, ədəbiyyatdan daha çox imperiya maraqları, yumşaq güc, təbliğat üçün istifadə olunduğunu nə zaman görəcəklər, ya da nə vaxta qədər görə-görə özlərini görməzliyə vuracaqlar?

Daha bir “elitar ziyalımız” Kamal Abdulla da guya rus dilinin özündə gizlətdiyi gerçək ictimai, siyasi təhlükələri anlamırmış, görmürmüş kimi, deyib: "3 nəfərin başqa dildə danışması ilə dilimiz əldən gedəcəksə, dünəndən getsə yaxşıdır". 

Adama deyən yoxdur ki, elə həmin “3 nəfəri” və rus dilini əlində bəhanə edən Rusiya Ukraynanın yarısını işğal edib, əhalisini qırğına verib. Beləsinə onu da deyən yoxdur ki, sizin kimi 3-5 “ziyalımız” olmaqdansa, dünəndən olmasa yaxşıdır…

Cəlal Məmmədov

“AzPolitika.info”