“Bizə Çar lazımdır. Çarsız dövrlər Rusiya üçün həmişə fəlakətlə başa çatır". 

“AzPolitika” xəbər verir ki, bunu Putinin keçmiş müşaviri və “Novorossiya” layihəsinin baş ideoloqu Vladislav Surkov Fransanın “L'Express” nəşrinə müsahibəsində deyib. Onun bu müsahibəsi kifayət qədər böyük əks-səda doğurub və Rusiyanın gerçək strateji hədəflərini, məqsədlərini təkcə avropalılara deyil, bütün keçmiş SSRİ respublikalarına da çatdırmış olub.

Məlumat üçün qeyd edək ki, Surkov 2004-cü ildən 2020-ci ilə qədər – 16 il Vladimir Putinin köməkçisi olub və MDB ölkələri, Abxaziya, Cənubi Osetiya, eləcə də Ukrayna üzrə əsas “kurator” sayılıb. O, həmçinin Rusiya hökumət başçısının müavini, Hökuməti Aparatının rəhbəri olub. 1-ci dərəcəli dövlət müşaviri statusnu daşıyan Surkov hazırda da “Rus dünyası” və “Novorossiya” layihələrinin əsas iodeoloqu kimi tanınır.

Surkov öz müsahibəsində açıq bəyan edib ki, “Rus dünyası” ideologiyasının sərhədləri yoxdur, ona görə də Rusiya öz təsirini bütün istiqamətlərə yaymağa davam edəcək: “Rus dünyası ideologiyasının sərhədi yoxdur və o, harada Rusiya təsiri varsa, orada mövcuddur”.

Onun dediyinə görə, “Tanrı icazə verdiyi və gücümüz çatan qədər” Rusiya bütün istiqamətlərdə genişlənəcək - hərbi, iqtisadi, ideoloji, humanitar və digər yollarla. Yəqin ki, bunu Azərbaycandakı rus dili, rus məktəbləri, rus mədəniyyəti və s. “qoruyucuları” da oxuyub, nə demək olduğunu anlayırlar...

Xatırladaq ki, Kreml keçmiş SSRİ və Rusiya İmperiyasının ərazilərinin tarixi Rusiya torpaqları olduğunu əsas gətirərək keçmiş sovet respublikalarına hərbi müdaxiləyə haqq qazandırmaq üçün dəfələrlə “Rus dünyası” anlayışından istifadə edib.

O, həmçinin Rusiyanın bu strateji hədəfinə mütləq çatacağını, bu hədəfin 2022-ci ilin fevralında Ukraynaya qarşı tam miqyaslı işğalın başlanmasından bəri, bu gün də dəyişmədiyini, hətta bu yolda “manevrlər, yavaşlamalar və fasilələr” olsa belə, hədəfə nail olunacağını iddia edib.


Surkov deyib ki, Rusiya üçün Ukraynanı öz təsir dairəsinə qaytarmaq Sovet İttifaqının dağılmasından bəri əsas məqsəd olub. O, Ukraynanı dövlət kimi tanımadığını deyərək, onu “süni siyasi qurum” adlandırıb. Bununla yanaşı, Surkov Ukraynanın gələcəkdə gerçək dövlət ola biləcəyini istisna etməyib, lakin "yalnız təbii sərhədlərində, yəni, daha kiçik ərazidə".

Surkov onun üçün Ukraynanın hansı sərhədlərin “təbii” olduğunu izah etməyib və əlavə edib ki, Ukraynanın bölüşdürülməsində Avropanın da payı olmalı, ona da pay verilməlidir...

Ətraf ölkələrə yalnız vassallıq vəd edən “Rus dünyası” ideoloqunun sözlərinə görə, Rusiyanın Ukraynadakı müharibəsi “rusları və anti-rusları ayıracaq” və sonuncuları “tarixi ərazilərində məhdudlaşdıracaq ki, onlar Rusiya torpağında yayılmağı dayandırsınlar”.

Surkov həmçinin hesab edir ki, SSRİ-nin dağılmasından sonra Ukraynanın Rusiyanın təsir dairəsinə qayıtması həm Moskvanın, həm də guya Kiyevin marağında olub: “Ukraynada olduğu kimi Rusiyada da həmişə ölkələrimizi bir-birinə yaxınlaşdırmaq və ya birləşdirmək barədə düşünənlər çox olub. Bu gün də onlar hələ də cəbhənin hər iki tərəfində mövcuddur. Bu təbiidir, biz eyni qandan olan insanlarıq”. Bu yerdə, yəni, ruslarla ukraynalıların eyni qandan olduğunu deyərkən, qeyd edək ki, Surkovun özü milliyətcə çeçendir. Onun atası çeçen, anası rusdur və atası ailədən ayrılandan sonra Dudayev soyadından imtina edərək, anasının soyadını götürüb...

O, həmçinin ABŞ-nin yeni başlayan “yenidənqurma siyasəti” nəticəsində vaxtilə SSRİ və Varşava Müqaviləsi ölkələrinin dağılması kimi Aİ və NATO-nun da dağılacağını proqnozlaşdırıb: “Vaşinqton durğunluqdan(SSRİ-dəki durğunluğa bənzədir – red.) çıxır. Onlar hələ yenidənqurmadan və yeni düşüncədən keçməlidirlər. Sovet yenidənqurması Şərq blokunun dağılmasına səbəb oldu. Sual yaranır: Amerika yenidənqurması nəticəsində NATO və Aİ dağılacaqmı? Qərar sizindir...”

ABŞ Prezidenti Donald Tramp haqqında danışan Surkov deyib ki, Tramp onda “müttəfiqlik etməyə çalışan bir insan” təəssüratı yaratmır. Buna baxmayaraq, Surkov Rusiya ilə Qərb arasında yaxınlaşmanın olacağını deyib. Hətta iddia edib ki, Rusiya və Qərbin siyasi sistemlərində azadlıq və nizam-intizam nisbətlərinin yaxınlaşması olacaq. "Gələcəkdə Qərb daha avtoritarlaşacaq, Rusiya isə daha az avtoritar olacaq" deyən Surkov bunun münaqişələr və faciələr bahasına baş verəcəyini qeyd edib.

Lakin onun fikrincə, yenə də ABŞ, Avropa və Rusiyanın yüksək dərəcədə qarşılıqlı anlaşma və əməkdaşlığa nail olacağı və bunun qaçılmaz olduğu şübhəsizdir: “Söhbət rus, Avropa və Amerika mədəniyyətlərinin mənsub olduğu böyük şimal sivilizasiyasının cənubdan gələn, dözülməz demoqrafik təzyiqlər qarşısında sağ qalmasından gedir”.

Surkov eyni zamanda dünyada ideal siyasi sistemin olmamasına diqqət çəkərək, indiki Rusiya idarəçiliyinin “Rusiya üçün sadəcə olaraq ən effektli model” olduğuna inandığını deyib və Putinin məhz Çar obrazında gördüyünü qeyd edib: “Bizə Çar lazımdır. Çarsız dövrlər həmişə bizim üçün fəlakətlə başa çatır".

Lakin Surkov, Rusiyanın nədən Çarsız yaşaya bilmədiyinə dair sualı cavablandırmaqdan yayınıb. Yəqin ona görə ki, bu suala səmimi cavab verməsi nə Kremlin, nə də Rusiya cəmiyyətinin xoşuna gəlməyə bilər...

Cəlal Məmmədov

“AzPolitika.info”