ABŞ-nin Azərbaycandakı sabiq səfirləri Riçard Morningstar və Robert Sekuta administrasiyaya müraciət edərək, 8 avqustda Vaşinqtonda keçirilən tarixi sammitdə qəbul edilmiş qərarların icrasını uzatmamağı və Cənubi Qafqazda daha fəal işləməyi tövsiyə ediblər.
Səfirlər bildirib ki, Prezident Donald Trampın vasitəçiliyi ilə imzalanmış Azərbaycan Prezidenti İlham Əliyev və Ermənistan Baş Naziri Nikol Paşinyan arasında sülh deklarasiyası regionda sülh, sabitlik və tərəqqi üçün mühüm addımdır. Onlar vurğulayıblar ki, ABŞ-nin iştirakı sənədin hazırlanmasında və gələcəkdə ratifikasiyası və icrasında həlledici rol oynaya bilər.
Morningstar və Sekuta qeyd ediblər ki, Vaşinqton sammiti Rusiyaya, İrana və digər regional oyunçulara “lazımi siqnalları” verib. ABŞ regionun iqtisadi inkişafına dəstək göstərərək, tranzit koridorunu nəzarətdə saxlaya və üçüncü tərəflərin zərərli təsirinə qarşı mübarizə apara bilər.
Sabiq diplomatlar xatırladıblar ki, Vaşinqton deklarasiyası yekun sülh müqaviləsi deyil, amma tərəflər yekun razılaşmanın imzalanması üçün zəruri addımlar atmağa söz veriblər. Deklarasiyanın uğurla icrası regionda dayanıqlı sülhün yaranmasına töhfə verə bilər.
Səfirlər vurğulayıblar ki, ABŞ administrasiyası Dövlət Departamenti, Ticarət Nazirliyi, İnkişaf üzrə Korporasiya və digər strukturlar vasitəsilə Ermənistan və Azərbaycan hökumətləri, onların şirkətləri və amerikalı investorlarla sıx əməkdaşlıq etməli, tranzit layihələrin həyata keçirilməsini təmin etməlidir. Eyni zamanda, ABŞ Türkiyə, Gürcüstan və Mərkəzi Asiya ölkələri ilə əməkdaşlıq edərək yeni nəqliyyat marşrutlarının potensialını tam reallaşdırmalıdır.
Morningstar və Sekuta hesab edirlər ki, ABŞ həmçinin ermənilər və azərbaycanlılarla cəmiyyətlərarası əlaqələri gücləndirməyə, uzunmüddətli və dayanıqlı sülh üçün şəxsi və ictimai dialoqu təşviq etməyə dəstək verməlidir.
“AzPolitika.info”
Şərhlər