Donald Trampın Ukraynadakı müharibəyə son qoyacağına söz verdiyi 24 saat artıq təxminən 400 günə çatıb. Tramp Prezident vəzifəsində olduğu 13 ay ərzində Ukrayna və Rusiya nümayəndələri arasında bir neçə görüş təşkil edə bildi. Lakin bu görüşlər heç bir ciddi nəticə verməyib. Bu il keçirilən son üç danışıqlar raundu belə (ikisi Əbu-Dabidə, biri isə bu həftə Cenevrədə) müharibə edən tərəfləri sülh razılaşmasına yaxınlaşdıra bilmədi.
“AzPolitika” xəbər verir ki, Amerika rəsmilərinin “The Wall Street Journal”-a dediyinə görə, Tramp indi İranla sövdələşmə və Qəzzanın yenidən qurulması ilə daha çox maraqlanır, nəinki Ukrayna ilə.
Onların sözlərinə görə, Tramp artıq Vladimir Putinə və ya Volodimir Zelenskiyə sövdələşmə üçün təzyiq göstərmir. Əvvəllər o, dəfələrlə Ukraynanı barışmazlıqda günahlandırıb. Həmçinin, ötən payız Rusiyaya qarşı neft sanksiyaları tətbiq edib, Hindistanı Moskvadan xam neft alışını azaltmağa məcbur edib və “kölgə donanmasını” təqib etməyə başlayıb. Lakin indi Tramp administrasiyası Ukraynadakı sülh prosesinə marağını tədricən itirir və digər geosiyasi məsələlərə daha çox vaxt ayırır.
Trampın əsas marağı hazırda İrana yönəlib. Onu uranın zənginləşdirilməsindən imtina etməyə və ya hətta ballistik raket proqramını ləğv etməyə məcbur etmək üçün Tramp 2003-cü ildə ABŞ-nin İraqa hücum etməyə hazırlaşdığı vaxtdan bəri Yaxın Şərqdə ən böyük hava qüvvələrini toplayıb. İrana zərbə (uğurlu olarsa) Trampa noyabr ayında keçiriləcək ABŞ-nin aralıq konqres seçkilərindən əvvəl seçicilərə “qələbə” təqdim etməyə imkan verə bilər.
Hazırda Trampın reytinqi rekord dərəcədə aşağı səviyyədədir: amerikalılar artan qiymətlərdən, iqtisadi vəziyyətdən və daha çox onun administrasiyasının immiqrasiya əleyhinə siyasətindən narazıdırlar.
“AzPolitika.info”
Şərhlər