Vladimir Putin bu gün Ukraynadakı Rusiya qoşunlarının komandanlığında dəyişiklik elan edib və onların qarşısında bütün Donbası mümkün qədər tez ələ keçirmək tapşırığı qoyulub.

“AzPolitika” xəbər verir ki, Putin bunu Müdafiə Nazirliyinin rəhbərliyi ilə görüşdə bildirib. Görüşlə bağlı Rusiya mediasında məlumat yayılıb.

Beləliklə, Donetsk vilayətinin şimal-qərb və mərkəzi hissələrində fəaliyyət göstərən “Mərkəz” Qruplaşmasının komandanı, Buça qətliamında iştirak etməkdə ittiham olunan 55 yaşlı general Valeri Solodçukun yerinə daha əvvəl “Şərq” Qruplaşmasına komandanlıq etmiş 54 yaşlı general Andrey İvanayev təyin edilib.

"Mərkəz Qruplaşması Donetsk Xalq Respublikasının azad edilməsində ən vacib və həlledici vəzifələri yerinə yetirən aparıcı bölmələrimizdən biridir. Qruplaşmaya kimin rəhbərlik edəcəyi, kimin komandanlıq edəcəyi məsələsi sadə məsələ deyil", - deyə Putin bildirib.

Putinin dediyinə görə, Solodçuk qoşunların komandanlığından tamamilə uzaqlaşdırılıb və indi Müdafiə Nazirliyinin Arxa Cəbhə Xidmətinə rəhbərlik edəcək.

Putin Donetsk və Zaporojye vilayətlərinin inzibati sərhədi yaxınlığında, Cənubi Donetsk ərazisində fəaliyyət göstərən “Şərq” Qruplaşmasına isə İvanayevin yerinə həmin Qruplaşmanın Baş Qərargah rəisi Pyotr Bolqayevi təyin edib.

Putin komandanları dəyişmək qərarına Rusiyanın Ukraynadakı hücum tempinin kəskin şəkildə yavaşlaması fonunda gəlib. Ukraynanın OSINT layihəsi olan “DeepState”-ə görə, iyul ayında rus qoşunları Ukrayna ərazisinin yalnız 88 kvadrat kilometrini, iyun ayında 57 kvadrat kilometrini nəzarətə götürməyi bacarıblar. May ayının sonuna qədər isə hətta Rusiya ordusu 11 kvadrat kilometr ərazi itirib. Müqayisə üçün, yanvar-aprel aylarında Rusiya qoşunları ayda 126-245 kvadrat kilometr Ukrayna ərazisini, ötən ilin sonunda isə ayda təxminən 500 kvadrat kilometri işğal edə bilmişdi.

“Reuters”-in məlumatına görə, Rusiya Baş Qərargahı ötən il Putinə Ukrayna cəbhəsinin tezliklə çökəcəyini və "qala şəhərləri"nin - Konstantinovka, Drujkovka, Slavyansk və Kramatorskun Rusiyanın nəzarəti altına keçəcəyini vəd etmişdi. Lakin buna nail olunmadı və bu il son tarixlər əvvəlcə payıza, daha sonra isə ilin sonuna təxirə salındı. Ancaq indi nəinki müstəqil hərbi ekspertlər, hətta Kremlə yaxın hərbi rəsmilər də bu tarixləri qeyri-real hesab edir və Donbas uğrunda müharibənin 2027-ci il boyu davam edəcəyi barədə xəbərdarlıq edirlər.

Bununla bərabər, “Bloomberg” Agentliyinin mənbələrinə görə, hücumun iflic olmasına və Ukrayna Silahlı Qüvvələrinin Rusiyanın dərinliklərinə endirdiyi getdikcə daha ağrılı olan zərbələrə baxmayaraq, Putin Donbasın tamamilə ələ keçirilməsində qətiyyətlə israr edir. Qeyd olunur ki, o, Donetsk vilayətini tam nəzarət altına almadan sülh danışıqları aparmaq niyyətində deyil.

“Financial Times” mənbələrinə görə isə Putinin ambisiyaları daha geniş ola bilər - hətta Kiyev və Odessa da daxil olmaqla, Dneprin sol sahili boyunca Ukraynanın bütün ərazisi üzərində nəzarəti ələ keçirmək nöqtəsinə qədər. Qəzetin mənbələrindən biri vəziyyəti belə təsvir edib: "Ona deyilir ki, ukraynalılar tükənir, cəbhə çökür və əsgərləri qurtarır". Reallıq isə bundan xeyli fərqlidir…

Strateji və Beynəlxalq Araşdırmalar Mərkəzinin (CSIS) hesablamalarına görə, Rusiya Baş Qərargahının generalları ötən il Ukrayna ərazisinin cəmi 0,8%-ni (4831 kvadrat kilometr), 2024-cü ildə (3604 kvadrat kilometr) isə 0,6%-ni nəzarətə götürə biliblər. Bu arada, Rusiya ordusunun itkiləri 2026-cı ilin ortalarına qədər ölü və yaralı olmaqla, 1,4 milyona çatıb. Bu, İkinci Dünya Müharibəsindən bəri Sovet İttifaqı və Rusiyanın bütün müharibələrdə birlikdə itirdiyindən daha çoxdur.

C.Məmmədli

“AzPolitika.info”