İsrail və ABŞ rəsmilərinin verdiyi məlumata görə, Tramp administrasiyası Suriya və İsrail ilə razılıq əldə etdikdən sonra Beynəlxalq Atom Enerjisi Agentliyi (BAEA) ilə birlikdə yaxın zamanlarda Suriyadakı gizli bir obyektdə saxlanılan nüvə materiallarını ölkədən çıxaracaq.

"AzPolitika" xəbər verir ki, bu barədə "Axios" nəşri məlumat yayıb.

Tramp administrasiyası və BAEA materialların təhlükəsizliyini təmin etmək, eləcə də İsrail, Suriya və Türkiyənin cəlb olunduğu həssas ərazi münaqişəsinin kəskinləşməsinin qarşısını almaq üçün diplomatik səylərini davam etdirir. Bildirilir ki, aylarla davam edən gizli diplomatik danışıqlardan sonra bir neçə həftə əvvəl tərəflər arasında razılıq əldə olunub.

Əl-Kibar reaktoru və gizli materiallar

Bəşər Əsəd rejimi dövründə Əl-Kibardakı obyektdə gizli nüvə proqramı hazırlanmışdı. Bu proqram 2007-ci ildə İsrail Hərbi Hava Qüvvələrinin reaktoru bombalaması ilə böyük ölçüdə sıradan çıxarılıb. Bununla belə, bəzi tədqiqat mərkəzləri və anbarlar toxunulmaz qalıb.

İsrail rəsmilərinin sözlərinə görə, Əsəd reaktor layihəsinin bir hissəsi olaraq "99 nömrəli ərazi" adlandırılan obyektdə nüvə materialları saxlayıb. Bu materiallar bilavasitə nüvə silahı hazırlamaq üçün kifayət etməsə də, radioaktiv çirklənməyə səbəb ola biləcək "çirkli bomba" istehsalında istifadə oluna bilər.

Suriyada hakimiyyət dəyişikliyindən sonra BAEA yeni hökumətlə Əl-Kibar reaktoruna və digər nüvə obyektlərinə baxış keçirilməsini nəzərdə tutan saziş imzalayıb.

E. Səlimov

AzPolitika.info