Bakının Nəsimi rayonunda, Tbilisi prospekti yaxınlığında, “Avropa” otelinin arxasında satışa çıxarılan dəbdəbəli malikanənin qiyməti böyük marağa səbəb olub.

“AzPolitika” xəbər verir ki, elan saytıdna yer alan məlumatda sözügedən villa üçün 12 milyon manat tələb olunur.

Malikanə 35 sot torpaq sahəsinin üzərində yerləşir. İki mərtəbədən ibarət olan evdə ümumilikdə 10 otaq var. Elanda bildirilir ki, villa tanınmış tikinti şirkətlərindən biri tərəfindən inşa olunub. Ev sahibinin iddiasına görə, tikili 12 ballıq zəlzələyə belə davamlıdır.


Malikanənin daxilində 5 yataq otağı, geniş zal, ofis və böyük hovuz yerləşir. Evin interyerində isə bahalı və dəbdəbəli əşyalar üstünlük təşkil edir. Villa İtaliya istehsalı mebellərlə təchiz olunub.

Məlumat üçün bildirək ki, hazırkı məzənnə ilə 12 milyon manat təxminən 7,06 milyon dollar edir. Maraqlıdır ki, bu məbləğlərə dünyanın müxtəlif yerlərində hətta özəl ada almaq belə mümkündür.


Məsələn, ABŞ-nin Minnesota ştatında yerləşən “Gale Island” adası hazırda 7,25 milyon dollara, yəni təxminən 12,33 milyon manata satışa çıxarılıb. Həmçinin ABŞ-nin Men ştatındakı “Sheephead Island” adası da 8 milyon dollara, yəni təxminən 13,6 milyon manata satışdadır. Adada iki ev və qayıq da mövcuddur.

Baham adalarında isə eyni pula daha böyük əraziyə malik ada əldə etmək mümkündür. “Northern Abaco Cays” bölgəsində yerləşən 26,3 hektarlıq özəl ada 7,999 milyon dollara, başqa sözlə, təxminən 13,6 milyon manata təklif olunur.

E. Bəyməmmədli

“AzPolitika.info”