“Ermənistanın rəsmi təbliğat maşını xarici resursların da köməyi ilə öz əhalisi arasında "analoqu olmayan iqtisadi artım" illyuziyası yaratmağa çalışır. Bu dezinformasiya kampaniyasının arxasında iki əsas məqsəd dayanır: mövcud hakimiyyətin reytinqini qaldırmaq və saxta tezislərlə revanşizm ideyalarını yenidən alovlandırmaq”.
“AzPolitika” xəbər verir ki, bu barədə keçmiş xarici işlər naziri, politoloq Tofiq Zülfüqarov deyib.
XİN-in keçmiş rəhbərinin sözlərinə görə, erməni cəmiyyətinə xarakterik olan "biz ən ağıllı və istedadlıyıq" nağılını bu dəfə bəsit bir təbliğat sxemi ilə sırımağa çalışırlar: "Guya Azərbaycanın qələbəsi neftin sayəsində olub, Ermənistanın cavab qələbəsi isə 'erməni iqtisadi möcüzəsi' hesabına baş tutacaq".
T.Zülfüqarov vurğulayıb ki, bu təhlükəli oyunda əsas benefisiar (mənfəət götürən) Rusiya Federasiyası və sanksiyalardan yayınaraq varlanmaqda maraqlı olan Qərbdəki müəyyən dairələrdir: "Ermənistan Rusiya üçün sanksiyalardan yan keçmək üçün yaxşı pərdələnmiş bir tranzit kanalı rolunu oynayır. Rəsmi İrəvanın bəyan etdiyi "iqtisadi möcüzə'nin yarısından çoxu sanksiyalardan yayınmağa göstərilən xidmət, sənədlərin saxtalaşdırılması və istehsalçı ünvanlarının dəyişdirilməsindən ibarətdir".
Keçmiş nazir Ermənistanın ticarət dövriyyəsindəki 13,4 milyard dollarlıq kəskin artımın arxasında duran real rəqəmləri və süni intellekt vasitəsilə hazırladığı təhlili təqdim edib. Rəsmi statistika tranzit axınlarından təmizləindikdə, ölkənin real milli istehsalı acınacaqlı görünür:
-Maşın, avadanlıq və texnika - Eksport: 1,30 mlrd. dollar (Yerli istehsalın payı - 5%-dən az);
Sxemin mahiyyəti belədir: Sanksiyalardan yayınmaq üçün 100 faizlik reeksport. Smartfonlar, prosessorlar, çiplər, kompüter avadanlıqları, məişət texnikası və avtomobillər Asiyadan (Çin, BƏƏ, Honq-Konq) alınaraq birbaşa Rusiya bazarına yönəldilir. Ermənistan burada yalnız logistik və hüquqi hab rolunu oynayır.
-Qızıl, qiymətli daşlar və metallar - Eksport: 2,85 mlrd. – 5,61 mlrd. dollar (Yerli istehsalın payı: 15% – 20%.);
Mürəkkəb maliyyə-əmtəə reeksportudur. Qızıl və almaz həcminin 80-85%-i tranzit axındır. Rusiya qızılı və almaz xammalı Ermənistana gətirilir, burada minimal sənədləşmə və ya fiziki emaldan (cilalanma) keçərək "mənşə pasportu" dəyişdirilir, daha sonra BƏƏ və Honq-Konq bazarlarına çıxarılır. Ermənistanın öz qızıl hasilatı bu okeanda yalnız bir damladır.
-Digər mallar – tekstil, folqa, energetika - Eksport: 1,05 mlrd.dollar (Yerli istehsalın payı ~85%.);
Burada sanksiya izi minimaldır. Alüminium folqa ("Armenal" zavodu), elektrik enerjisi (İrana tədarük) və geyim ölkə daxilində istehsal olunur. Lakin tikiş sənayesi də Rusiyadan çıxan Qərb brendlərinin sifarişlərini yerinə yetirməklə sanksiya konyukturasından bəhrələnib.
-Qida məhsulları, spirtli içkilər və tütün - Eksport: 1,30 mlrd. dollar (Yerli istehsalın payı: 91% – 99%)
Sanksiya sxemlərindən asılı olmayan ənənəvi sahədir. Erməni konyakı, şərab, təzə meyvə-tərəvəz və konservlər ölkə daxilində istehsal olunur və əsas satış bazarı tarixi olaraq Rusiyadır.
-Dağ-mədən sənayesi - Eksport: 1,30 mlrd.dollar (Yerli istehsalın payı: 100%.)
Bu, Ermənistan iqtisadiyyatının bünövrəsidir. Mis konsentratı, molibden və sink erməni yataqlarından çıxarılaraq qlobal bazarlara (əsasən Çin və Aİ) göndərilir və sanksiya gündəliyi ilə kəsişmir.
Tofiq Zülfüqarov yekunda qeyd edib ki, görünən "iqtisadi möcüzə"nin 50%-dən çoxu sadəcə olaraq Rusiyaya sanksiyalardan yayınmağa kömək etməkdən və kağız üzərində fırıldaqlardan ibarətdir.
Rasim Əliyev
“AzPolitika.info”
Şərhlər