Bu gün Azərbaycan parlamentinin sabiq sədri, Azərbaycanın ən məşhur siyasi mühaciri Rəsul Quliyevin ad günüdür. Onun 66 yaşı tamam olur. 16 ildir Amerikada yaşayan R.Quliyev ad günü ilə bağlı Facebook-da bunları yazıb:

“Mən heç vaxt ad günü keçirmirəm. Anadan olandan 17 yaşına qədər böyüdüyüm kənddə, reqionda yaşayış çox ağır idi, nəinki ad günü, hətta adın yadından çıxırdı. Ümumiyyətlə, heç vaxt ad günüm yadıma düşməyib. Bir dəfə 50 yaşımı dostlarım yığışıb gəlib, yadıma salıblar və məcbur ediblər qeyd edək. O məclisdə də bir dəfə çox qısaca məni təbrik ediblər və ad gününü yaddan çıxarmışıq. Bu gün e-maili, Facebook-u açanda yüzlərlə təbrikə rast gəldim. Düzü onların 90 faizini tanımıram. Hər birinizə cavab yazmaq çox uzun çəkər. Ona görə məni təbrik edənlərə ən səmimi arzularımı çatdırmaq istəyirəm”.

Rəsul Quliyev uzun illərdir xaricdə yaşasa da, hər il onun ad günü Bakıda da qeyd olunub. Dost-tanışları, sədri, lideri olduğu partiyanın üzvləri imkan daxilində R.Quliyevin ad gününü qeyd ediblər. Bu qeydetmə, adətən yeyib-içmək məclisində Rəsul Quliyevin şəninə bəlağətli tostlarla müşaiyyət olunub.

Lakin sözsüz ki, son illərdə keçirilən bu məclislər istər masanın üstünə düzülən təamların səviyyəsinə, istərsə də iştirakçıların sosial statuslarına görə R.Quliyevin parlament sədri olduğu dövrlərdəki məclislərdən geri qalıb. 1995-ci ildə R.Quliyevin ad günü daha samballı qeyd olunmuş, bir sıra hökumət üzvlərinin yarımgizli qutlamasında gələcək prezidentin – Rəsul Quliyevin sağlığına badələr qaldırılmışdı. Bir sonrakı ad günündə Rəsul Quliyev artıq vəzifədə deyildi. Lakin həmin il, ondan sonrakı il, daha sonra gələn illərdə, taa ki, 2003-cü ilə kimi, R.Quliyevin ad günləri daha diqqətçəkən olmuş, açıq və gizli şəkildə “gələcək prezidentin” sağlığına badə qaldıranların sayı durmadan artmışdı. Çünki R.Quliyev qısa zaman kəsiyində Əliyevdən sonrakı prezidentliyə potensial namizədə çevrilmişdi.

Lakin illərdən 2003 olanda hər şey tərsinə döndü. Rəsul Quliyev tutulacağından çəkinərək Azərbaycana qayıtmadı, Uca Tanrının ona bəxş etdiyi tarixi şansı əlindən qaçırdı... Bundan sonra Rəsul Quliyevin ictimai şüurdakı yüksəlişi eyni sürətlə tənəzzülə çevrildi. Paralel olaraq onun ad gününü xatırlayanların və qeyd edənlərin sayı da, illər ötdükcə azalmağa başladı...

Bu il Bakıda kimlərsə Rəsul Quliyevin ad gününü qeyd edibmi, bu barədə heç bir məlumata malik deyilik. Lakin tam əminliklə iddia edə bilərik ki, bu gün Bakıdakı heç bir məclisdə, qutlamada “gələcək prezidentin” sağlığına badə qaldırılmayıb...

2013 Rəsul Quliyevə bağlanan son ümidlərin də dəfni ili oldu. Ona görə yox ki, Rəsul Quliyevin artıq 66 yaşı var və özünün də dediyi kimi, 2013 bu səbəbdən onun son şansı idi. Əksinə, öz xalqlarının taleyində iz qoymuş siyasətçilərin bir çoxu, məhz bu yaşdan sonra uğurlarının zirvəsinə qalxa biliblər. Uzağa getməyək, Heydər Əliyev 70 yaşında prezident olub, ölkəni 10 il idarə etmədimi?...

Amma Rəsul Quliyevin siyasətdə həqiqətən də heç bir şansı qalmayıb. Bu vaxtdan sonra onun siyasi iddialarının reallaşması möcüzə olar. Çünki yaş üstünə gələn yaş Rəsul Quliyevi siyasi cəhətdən müdrikləşdirmək əvəzinə, onun olub-qalan müdrikliyini də apardı.

Bundan sonra bizə siyasətdə uduzmuş Rəsul Quliyevə şəxsi həyatında uğurlar arzulamaqdan başqa bir iş qalmır.

Rasim ƏLİYEV

AzPolitika.info