Vurulan gömrük generalı ilə bağlı şok açıqlamalar

Vurulan gömrük generalı ilə bağlı şok açıqlamalar

Məlum olduğu kimi, bu gün Dövlət Gömrük Komitəsinin (DGK) Gömrük Hüquqpozmalarına Qarşı Mübarizə Baş İdarəsinə yeni rəis təyin olunub. Belə ki, komitənin Balakən Gömrük İdarəsinin rəisi işləmiş Baba Salayev Baş İdarənin rəhbəri təyin edilib. Bundan əvvəl Baş İdarənin rəisi işləmiş general-mayor Güloğlan Muradlı isə rəis müavini təyin olunub.

Komitədən bildirilib ki, bu adi prosedur qaydadır: “Bu, Komitə daxilində adi yerdəyişmədir və mütəmadi olaraq baş verir”.

Bunula belə, general-mayor Güloğlan Muradlının rəis olduğu idarədə müavin vəzifəsinə keçirilməsi KİV-lərdə onun "vurulması" kimi qiymətləndirilib. Bir neçə saytda isə onun bu generalın "vurulmasının" səbəbi kimi maraqlı bir versiya irəli sürülüb. Bildirilib ki, G.Muradlı AXCP sədri Əli Kərimlinin qrup yoldaşı olub, istisna deyil ki, onunla əlaqələrinə görə cəzalandırılıb.

Əli Kərimlinin bir digər tələbə yoldaşı, deputat Fazil Mustafa Feysbukda yazdığı postunda G.Muradlının Əli Kərimli və onunla qrup yoldaşı olduqlarını təsdiqləsə də, saytların bu məqamı qabartmasına etirazını bildirib. AzPolitika.info F.Mustafanın postunu təqdim edir:

"Mediada xəbərin təqdimatının xüsusi əhəmiyyəti var. Aşağıdakı informasiyada da bunu dəhal sezmək olur (F.Mustafa postu ilə birlikdə musavat.com-un sözügedən xəbərini də təqdim edir-red). Demək gömrük generalı Güloğlan Muradovun vəzifəsi bir pillə aşağı salınıb. Mənim tələbə yoldaşım olub və hətta eyni qrupda oxumuşuq, gömrük sistemində ən bilikli ve peşəkar kadrlardan biridir. General rütbəsi də indiki hakimiyyət tərəfindən verilib. İndi tutaq ki, Əli Kərimlinin də tələbə yoldaşı olub, nə olsun? Gömrük Komitəsinin rəhbərliyi öz mülahizələrinə görə hansısa qərar qəbul edibsə, bunu medianın 30 il öncə adamın oxuduğu məktəb və ya tələbə yoldaşları ilə əlaqələndirməsinin məntiqi izahını vermək həqiqətən çətindir. Ümumilikdə isə Güloğlan Muradovla tələbə yoldaşı kimi bir-birimizin xeyrində-şərində iştirak edirik, Əli Kərimli ilə hansısa münasibətinin olmadığını dəqiq bilirəm. Gömrük sisteminə isə savadlı kadr olaraq mənim tərəfimdən 1992-ci ildə işə göndərilib. Demək ki, informasiyanın təqdimatına hörmətli jurnalistlərimiz daha dəqiq yanaşmalıdırlar ki, cəmiyyət tərəfindən yanlış anlaşılmasınlar".

V.Nəsibov

AzPolitika.info