İŞ ADAMI ASLAN İSMAYILOVUN HƏBSİNİ İSTƏDİ - Məhkəmə təxirə salındı (Yenilənib)

Tanınmış iş adamı, "Xəmsə" MMC-nin rəhbəri Mürvət Həsənli ilə vəkil Aslan İsmayılov arasında bu gün keçirilən və saat 10:30-da 16:00-a təxirə salınan məhkəmə prosesi davam etdirilib. Musavat.com-un məlumatına görə, Səbayel Rayon Məhkəməsində davam etdirilən prosesdə təqsirləndirilən şəxsin məhkəmə sənədləri ilə tanış olmaq üçün verdiyi vəsatət təmin edilib.

A.Ismayılovun prosesin Səbayel Rayon Məhkəməsindən digər məhkəməyə keçirilməsi barədə verdiyi digər vəsatət baxılmamış saxlanılıb.

Məhkəmə iclası 31 iyul saat 15:00-a təxirə salınıb.

***

T

Çıxış hüququndan istifadə edən M.Həsənli şəxsinin, Azərbaycan mətbuatının, ziyalılarının A.İsmayılovun şər-böhtanlarından, təhqirlərindən qurtulması üçün onun zalda həbs edilməsini xahiş edib. Beş dəqiqəlik fasiləyə çıxan məhkəmə heyəti qayıtdıqdan sonra proses saat 16:00-a qədər təxirə salınıb. Təqsirləndirilən şəxs buna etiraz edərək, həmin iclasa gəlməyəcəyini bildirib. Lakin onun etirazları nəticə verməyib.

Qeyd edək ki, Aslan İsmayılov rəsmi "Facebook” səhifəsində və KİV üçün keçirdiyi brifinqdə Mürvət Həsənlinin ünvanına şər-böhtan yağdırıb. Bu səbəbdən iş adamı onu məhkəməyə verərək, Cinayət Məcəlləsinin 147.2 (ağır və ya xüsusilə, ağır cinayətdə ittiham etməklə böhtan atma) maddəsi ilə cəzalandırılmasını tələb edr.

Tərəflər arasında gərginliyin kökündə Türkiyənin "Emre Piliç” şirkətinin M.Həsənli ilə borc çəkişməsi durur. A.İsmayılov bu işdə "Emre Piliç” şirkətinə vəkillik edir. Onu da xatırlatmaq yerinə düşər ki, Azərbaycana damazlıq yumurta ixrac edən bu şirkətin səhmdarları arasında 2 erməninin olduğu üzə çıxıb. Belə ki, ermənilər Bozaçıyan və Oksayan bu şirkətdə 30 faizlik paya sahiblik edirlər. M.Həsənli bu fakt üzə çıxandan sonra şirkətlə işgüzar münasibətləri kəsdiyini bildirir. A.İsmayılov isə əksinə, "Emre Piliç”in yarıerməni şirkəti olmasına əhəmiyyət vermədən onun müdafiəsinə qoşulub. (Musavat.com)