"BU TERRORUN CAVABI VERİLƏCƏK!..." - "Səfirliyinə hücuma görə İran məsuliyyət daşıyır"

Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev Azərbaycanın İrandakı səfirliyinə edilmiş silahlı hücumu şərh edib.

Mərkəzdən APA-ya verilən xəbərə görə, şərhdə deyilir: "Bu gün saat 8:30-da Azərbaycanın İrandakı Səfirliyinə silahlı hücum olub. Hadisə nəticəsində bir nəfər azərbaycanlı təhlükəsizlik əməkdaşı həlak olub, iki nəfər xəsarət alıb.

Qeyd etmək lazımdır ki, son 2 ildə bu Azərbaycanın diplomatik missiyasına edilmiş sayca 5-ci hücumdur. Bunlardan birincisi İrana bağlı dini qruplaşma tərəfindən Londonda, 2 hücum radikal ermənilər tərəfindən Parisdə və növbətisi yenə ermənilər tərəfindən Beyrutda törədilib.

Diplomatik əlaqələr haqqında 1961-ci ildə qəbul olunmuş Vyana Konvensiyasına əsasən ev sahibi ölkə xarici missiyaların təhlükəsizliyinə tam məsuliyyət daşıyır. İran rəsmiləri hücumun şəxsi səbəblər zəminində baş verdiyini iddia etsələr də, yenə də buna görə məsuliyyət daşıyırlar. Azərbaycana qarşı İranda əks təbliğat kampaniyasından və daha əvvəl Londona edilmiş hücumdan xəbərdar olan İran Azərbaycan səfirliyinin mühafizəsi üçün tədbirləri daha da gücləndirməli idi. Bu iranlı və ermənilər tərəfindən Azərbaycan səfirliklərinin hücuma məruz qaldığı digər ölkələrə də aiddir".

Yaxın Şərq ölkələri üzrə ekspert Vüqar Zifəroğlu qeyd edib ki, Tehrandakı səfirliyimizə xain hücum terror hadisəsidir və İran rəsmilərinin "şəxsi münaqişə zəmini" ilə bağlı açıqlamaları absurddur: "Hazırda hücumla bağlı İran mediasında yayılan məlumatlar da dezinformasiya xarakteri daşıyır və aldadıcı xarakterə malikdir".

O bildirib ki, hücum anı ilə bağlı yayılan videogörüntülərdən müşahidə etmək olar ki, bu terror əvvəldən planlaşdırılıb və düşünülüb: "Hücum edən şəxs xüsusi təlim keçmiş və silahla peşəkarcasına davrana bilən biridir. Hücumun gedişatından görmək olur ki, səfirlik binasına daxil olan şəxs konkret olaraq səfirlik əməkdaşlarını qətl etmək, terror törətmək məqsədi ilə ora daxil olub. Digər tərəfdən, hücum zamanı səfirliyin ətrafının qorunmaması məsələsi ciddi şübhələr yaradır. Halbuki, diplomatların və diplomatik binaların təhlükəsizliyinin təmin edilməsi ilə bağlı Vyana Konvensiyası mövcuddur və diplomatik fəaliyyət Vyana Konvensiyası əsasında tənzimlənir. Konvensiyanın maddələrinə əsasən, səfirlik binaları toxunulmazdır və bu toxunulmazlığı səfirliyin yerləşdiyi ölkə təmin etmə öhdəliyi daşıyır.

Bu hücum Azərbaycana təhdid xarakteri daşıyır. Amma anlamırlar ki, belə təhdidlərlə nəyəsə nail olmaq olmaz. Heç şübhəsiz ki, bu hücumun cavabı veriləcək!

Bildiyiniz kimi, hər ölkənin səfirliyi beynəlxalq hüquq nöqteyi-nəzərdən toxunulmazdır və yerləşdiyi ərazi həmin ölkənin ərazisi hesab edilir. Vətənimizin bu kiçik parçasına edilən xaincəsinə saldırı nəticəsində qəhrəmancasına şəhid olan səfirlik əməkdaşımıza Allahdan rəhmət, yaralımıza acil şəfa diləyirik!"