ABŞ-də yaşayan eks-spiker Rəsul Quliyev “Müsavat TV”-yə müsahibəsində məşhur kinorejissor Rasim Ocaqovun çəkdiyi “Təhminə və Zaur” filminin ərsəyə gəlməsindəki rolundan danışıb.

“AzPolitika.info” xəbər verir ki, filmin bütün maliyyə xərclərini şəxsən qarşıladığını deyən keçmiş spiker, çəkilişlər zamanı üzləşdiyi maraqlı əhvalatlardan da danışıb. Onun dediklərindən belə məlum olur ki, filmdə bütün detallar onunla razılaşdırılıb: “Rasim Ocaqov günlərin birində mənə zəng elədi, dedi ki, filmə çəkməyə “Zaur” axtarır. Bildirdi ki, Fəxrəddini (Fəxrəddin Manafov - red.) çəkmək istəyir. Dedim, ay kişi, “Təhminə” ondan uzundur. Dedi, sən narahat olma, ayağının altına kərpic-zad qoyub düzəldəcəyik. Dedim, vallah özün bilərsən, amma belə düşünürəm ki, o yaxşı variant deyil. Nə isə... O getdi “Zauru” axtarmağa, Leninqraddan bir suriyalı tapdı. Şəklini mənə göstərdi, dedim, hə, bu yarayır, boyu da yaxşıdır. Nə isə, bunu bir neçə gün filmə çəkdi. Yenə bir gün mənə zəng elədi ki, bəlaya düşmüşəm, kömək elə. Dedi, Miral da buradadır (Filmdə baş rolu oynayan Türkiyəli aktrisa Meral Konrat). Zaqulbada komsomolçuların istirahət yeri vardı, getdim ora, görüşdük. Miral hələ gəlməmişdi. Rasim dedi, bu suriyalını qovmaq istəyirəm. Deyəsən, Miralla onun arasında həqiqi məhəbbət yaranıb, bu da işə mane olur. Amma Miral razılıq vermir, deyir, onu qovsan, mən də çıxıb gedəcəm. Dedi, sən ona izah elə. Miral xanımı çağırdıq, mən də guya onu başa salıram. Miral özündən çıxdı, dedi, bu (Rasim Ocaqov – red) öpüş səhnəsini 10-15 dəfə təkrar-təkrar çəkir, mən daha istəmirəm. Dedim, gəl belə danışaq: mən Rasim müəllimdən xahiş edəcəm, bu dəfə iki dəfə öpüşərsən (Gülür). Filmin yarısını çəkib qurtarmışdı, amma sonra suriyalının yerinə Fəxrəddini götürdü...”

R.Quliyev daha sonra İstanbulda Meral Konratla görüşündən, ona 3 min dollara paltar almasından bəhs edib.

R.Quliyevin müsahibəsinin sözügedən hissəsini aşağıdakı videolinkdə izləmək olar:


Rasim Əliyev 

“AzPolitika.info”