Avropa İttifaqının (Aİ) rəsmi jurnalı Avropa İttifaqı Şurasının Rusiyaya qarşı 14-cü sanksiyalar paketi ilə bağlı qərarlarını dərc edib.
Siyahıda Rusiyanın Ukraynaya təcavüzünün təşkilində və ya dəstəklənməsində rolu olan, sanksiya siyahılarına daxil edilmiş hüquqi şəxslərin adları açıqlanıb.
Onların arasında media meneceri Aram Qabrilyanov, müğənni Yaroslav Dronov (Şaman), Moskva Şəhər Dumasının deputatı və keçmiş idmançı və teleaparıcı Mariya Kiseleva, müğənni Polina Qaqarina, media meneceri Aleksey Qoreslavski, aktyor, keşiş və ictimai xadim İvan Oxlobıstin, Federal İdarənin rəhbəri Vadim Yakovenko, Çeçenistan rəhbəri Ramzan Kadırovun anası Aymani Kadirova, Rusiya və Belarus İttifaqı dövlət katibi Dmitri Mezentsev, iş adamları İqor Altuşkin, Taimuraz Bolloyev və Roman Trotsenko, hərbi sənaye kompleksi müəssisələrinin direktorları, yüksək vəzifəli şəxslər hüquq-mühafizə orqanlarının əməkdaşları, Ukraynanın işğal olunmuş ərazilərinin Rusiya administrasiyalarının rəsmiləri var.
Sanksiya siyahısında olan hüquqi şəxslər arasında “Eastern Stevedoring Company”, Qaponov-Qrexov adına Tətbiqi Fizika İnstitutu, ilhaq edilmiş Krımda “Artek” uşaq mərkəzi, Volqa-Dnepr və Ural Hava Yolları, Əhməd Kadırov Fondu, Belarus Respublika Gənclər İttifaqı, İnternetin İnkişafı İnstitutu və bir sıra hərbi-sənaye kompleksi müəssisələri mövcuddur.
Siyahıya həmçinin “RİA Novosti”, “Rossiyskaya qazeta” və “İzvestiya” qəzeti də daxildir. Aİ ərazisində bu saytlara girişin məhdudlaşdırılacağı deyilir.
Yeni paketin əsas məqamlarından biri Rusiyanın mayeləşdirilmiş təbii qazına aiddir: onun Avropa limanlarından tranzitinə məhdudiyyətlər qoyulur. Üçüncü ölkələr üçün nəzərdə tutulan Rusiya LNG-si artıq limanlar vasitəsilə Aİ-yə təkrar ixrac edilməyəcək. Eyni zamanda, Rusiyadan Aİ ölkələrinin özlərinə LNG tədarükünə qadağa tətbiq edilməyib. Rusiya kölgə donanmasının 27 tankerinə və xüsusən də silah və ya Ukrayna taxılının daşınması üçün istifadə edilən gəmilərə qarşı da sanksiyalar tətbiq edilir.
61 fiziki şəxs və ya şirkət Rusiya hərbi sənaye kompleksinə bilavasitə dəstək verdiyinə görə, sanksiya siyahısına daxil edilib, o cümlədən üçüncü ölkələrin - Çin, Türkiyə, Qazaxıstan, Qırğızıstan və BƏƏ şirkətlərinin də adları bu siyahıda yer alıb.
Həmçinin Aİ-də fəaliyyət göstərən siyasi partiyalar, media və QHT-lərin Rusiya dövlətindən və ya əlaqəli təşkilatlardan vəsait alması qadağan ediləcək. Bundan əlavə Avropa İttifaqının aviaşirkətlərinə Rusiya vətəndaşları və ya təşkilatları ilə dünya üzrə çarter və şəxsi uçuşlar həyata keçirmək üçün müqavilə bağlamaq qadağan ediləcək.
Rasim Əliyev
“AzPolitika.info”
Şərhlər