“Azərbaycanda 2024-cü ildə 8 yeni “Rolls-Royce” satılıb. Satılan avtomobillər arasında bir neçə “Rolls-Royce Ghost” da olub. Bu maşınların qiyməti 1 mln. 200 min manatdır. Ölkədə 1 nəfər də olsun rəsmi milyonçu yoxdursa, bu qiymətə avtomobili kimlər alır?”

“AzPolitika” xəbər verir ki, bu barədə REAL Partiyasının sədri Natiq Cəfərli “Facebook”-dakı paylaşımında bəhs edib.

Onun sözlərinə görə, Azərbaycanda 2024-cü ilə 1 mln. 585 min 265 ədəd minik avtomobili qeydiyyatdadır: “Ölkədə ən çox, 220 242 ədəd “Mersedes” markalı maşın var. Amma, “sovet-Rusiya” istehsallı avtomobillərin tamamının sayı (“VAZ”, “LADA”, “QAZ”, “UAZ”, “Moskviç” və s.) 296 261 ədəddir. Son 1 ildə, yəni 2023-cü il ilə müqaisədə 2024-də Çin istehsalı maşınların satışı, qeydiyyatı kəskin çoxalıb – “Changan” 1 ilə 4086 ədəd (84%), “BYD” 1 ilə 3072 ədəd (303%) artıb”.

Onun sözlərinə görə, 2023-cü ildə ölkədə 66 “Rolls-Royce” qeydiyyatda idi, 2024-cü ildə sayı 74-ə çatıb. “8 yeni “Rolls-Royce” satılıb, satılan avtomobillər arasında bir neçə “Rolls-Royce Ghost” da olub, bu maşınların qiyməti 1 mln. 200 min manatdır”, - o əlavə edib.

N.Cəfərlinin sözlərinə görə, “Rolls-Royce”-dən başqa 2024-cü ildə ölkədə çox bahalı digər maşınlar da satılıb – 35 ədəd “Jaguar”, 15 ədəd “Bentley” və s.

“Məmləkətdə 1 nəfər də olsun rəsmi milyonçu yoxdursa, büdcəyə ən çox vergi verən insanları tanımırıqsa, bəs 1 mln. 200 minə “Rolls-Royce Ghost” avtomobilini, və ya 500 minə qədər qiyməti olan “Bentley”-i kim alır?! Bəlkə ölkə öz “qəhrəmanlarını” tanısa yaxşı olar? Bu avtomobilləri fərdlərmi alıb, yoxsa dövlət-hökumət idarələri büdcə pulunumu bu maşınlara xərcləyib?!”

İqtisadçı “Rəsmi qurumlar deyir ki, Bakıda tıxacın çox olmasına səbəb avtomobilərin sayının çox olmasıdır. Halbuki, Azərbaycanda, Gürcüstana nisbətən hər 1000 nəfərə 2 dəfə daha az maşın düşür. Deməli, tıxacların səbəbi yol infrastrukturunun çatışmamazlığı, doğru idarəetmənin olmaması və ictimai nəqliyyatın bərbad vəziyyətidir”, - deyə vurğulayıb.

“AzPolitika.info”