Uzun illər boyunca Ermənistan Rusiyanın Cənubi Qafqazdakı mühüm müttəfiqi rolunu oynayıb. İrəvanın daxili siyasətində də Moskva ilə yaxın münasibətlər prioritet təşkil edib. Lakin 2018-ci ildə hakimiyyətə gələn Nikol Paşinyan ölkənin siyasi kursunu dəyişdi. Keçmiş millət vəkili, siyasi şərhlər müəllifi Qulamhüseyn Əlibəyli mövzu ilə bağlı bildirib ki, Cənubi Qafqazda formalaşan yeni siyasi reallıqlar regionda münasibətlərin xarakterini köklü şəkildə dəyişib. Robert Köçəryan və Serj Sarkisyan dövründə Ermənistanın təhlükəsizlik sistemi, enerji sektoru və iri biznes qrupları Rusiya ilə sıx inteqrasiya olunmuşdu. Lakin Paşinyan köhnə elitanı hakimiyyətdən uzaqlaşdıraraq İrəvanın xarici siyasətində çoxvektorlu yanaşmaya üstünlük verdi. Bu gün Ermənistan hakimiyyətinin Qərbyönlü addımları daxili müxalifətin müqaviməti ilə üzləşsə də, iki ölkə arasında ənənəvi təsir kanallarının bir hissəsi artıq əvvəlki kimi effektiv deyil.
Qulamhüseyn Əlibəylinin sözlərinə görə, Ermənistanda daxili siyasi proseslər mürəkkəb məcraya daxil olub. İrəvan ilə Moskva arasında münasibətlərdə iqtisadi və sosial amillər hələ də mühüm rol oynayır. Ermənistan iqtisadiyyatı, xüsusən enerji təminatı, əmək miqrasiyası və xarici ticarət Rusiya bazarı ilə sıx bağlıdır. Eyni zamanda Ermənistanda mövcud olan müxalif qüvvələr də ənənəvi əlaqələrin saxlanılmasını müdafiə edirlər. Rusiya mediasının regiondakı mövqeyi və ölkədə yerləşən hərbi bazası iki tərəf arasında strateji dialoqun davam etdiyini göstərir. Bununla belə, İrəvanın ABŞ, Fransa və Hindistanla hərbi-texniki sahədə əməkdaşlığı genişləndirməsi xarici siyasətdə balansı dəyişməyə yönəlib.
Siyasətçinin fikrincə, mövcud vəziyyətdə Paşinyan hakimiyyətinin əsas dayağı daxili seçim nəticəsində qazandığı mandatdır. İrəvanda keçirilən son seçkilər göstərdi ki, hökumət daxili dəstəyini saxlaya bilib. Qulamhüseyn Əlibəyli vurğulayır ki, xarici amillərin daxili siyasətə təsiri bəzən cəmiyyəti hökumətin ətrafında daha da birləşdirə bilər. Təcrübə göstərir ki, kənar təzyiqlər daxili siyasi həmrəyliyi artırır və bu baxımdan açıq qarşıdurmadan daha çox uzunmüddətli dialoqa üstünlük verilməsi daha real görünür. Ermənistanın Avropa İttifaqı və Avrasiya İqtisadi İttifaqı arasında seçimi məsələsinə toxunan ekspert bildirib ki, inteqrasiya prosesləri hüquqi müstəvidə həll olunmalıdır. Aİ qaydalarına görə bu təşkilata üzvlük məsələsi referendum tələb etsə də, hazırda bu mövzu İrəvan üçün aktual deyil. Aİİ çərçivəsində əməkdaşlıq isə iqtisadi zərurətlərdən irəli gəlir və Ermənistan hakimiyyəti bu məsələdə təmkinli mövqe nümayiş etdirir.
Şərhlər