ABŞ-də 1 SAATA, AZƏRBAYCANDA 3 HƏFTƏYƏ... - Dünya ölkələri üzrə həkim maaşları + SİYAHI

Həkimlərin gəlirləri ölkələr üzrə bir-birindən kəskin fərqlənir.

"AzPolitika" xəbər verir ki, 2025-ci il üzrə açıqlanan son statistik məlumata görə, bəzi ölkələrdə həkimlərin illik qazancı yüz minlərlə dollarla ölçüldüyü halda, bir sıra dövlətlərdə bu göstərici 20-30 min dollar səviyyəsindədir.

Həkimlərin ən çox qazandığı ölkə ABŞ-dir. Ölkədə həkimlərin illik orta maaşı 268 083 dollar göstərilir. Bu, aylıq hesabla təxminən 22,3 min dollara bərabərdir. ABŞ-ni İsveçrə – 266 900 dollar, Lüksemburq – 260 700 dollar və Bermud adaları – 235 787 dollar izləyir.

İlk beşliyə İslandiya da daxildir. Burada həkimlərin illik gəliri 202 900 dollar göstərilir. Avstraliya, Finlandiya, İrlandiya, Danimarka və Belçika da həkimlərin yüksək gəlir əldə etdiyi ölkələr sırasındadır.

Avropanın bir sıra inkişaf etmiş ölkələrində də həkim maaşları kifayət qədər yüksəkdir. Almaniyada illik göstərici 168 700 dollar, Böyük Britaniyada 163 200 dollar, Fransada 155 000 dollar, İtaliyada isə 151 500 dollar təşkil edir.

Şimali Avropa ölkələri də yüksək göstəricilərlə seçilir. Norveçdə həkimlərin illik maaşı 170 900 dollar, Avstriyada 170 700 dollar, Niderlandda 171 400 dollar, İsveçdə isə 112 200 dollar göstərilir. Polşada bu rəqəm 61 400 dollar, Rumıniyada 62 300 dollar, Bolqarıstanda 63 090 dollar, Macarıstanda 63 200 dollar, Türkiyədə isə 63 100 dollar təşkil edir.

Azərbaycanda isə vəziyyət bu ölkələrlə müqayisədə xeyli fərqlidir.

Dövlət Statistika Komitəsinin məlumatına görə, 2025-ci ilin yanvar-sentyabr aylarında səhiyyə sahəsində fəaliyyət göstərən şəxslərin orta aylıq əməkhaqqı 926,4 manat olub. Bu göstərici illik hesablandıqda təxminən 11 117 manat edir.

Bununla yanaşı, TƏBİB-in sabiq sədri Vüqar Qurbanovun ötən ilin sonunda verdiyi açıqlamaya əsasən, həkimlərin orta aylıq əməkhaqqı 1 850 manat təşkil edir. Bu rəqəm illik hesablamada 22 200 manat, 1 dolların 1,7 manat məzənnəsi ilə isə təxminən 13 060 dollar edir.

Bu rəqəm təqdim olunan beynəlxalq siyahıda ən aşağı göstəricilərdən biridir. Məsələn, Belarusda illik həkim maaşı 12 566 dollar, Misirdə 15 900 dollar, Pakistanda 18 600 dollar, Argentinada isə 21 089 dollar göstərilir.

Başqa sözlə, Azərbaycan üzrə 13 min dollarlıq göstərici Belarusdan bir qədər yüksək, lakin Misir, Pakistan və Argentina kimi ölkələrdən belə aşağı səviyyədədir.

Digər tərəfdən, həkimlərin illik gəlirləri ilə yanaşı, saatlıq qazancında da ölkələr arasında ciddi fərq müşahidə olunur.

Siyahının ilk pilləsində yenə ABŞ qərarlaşıb. ABŞ-də həkimlərin saatlıq qazancı 129 dollar göstərilir. İsveçrədə bu göstərici 128 dollar, Lüksemburqda 126 dollar, Bermud adalarında isə 113 dollar təşkil edir.

İlk beşlikdə yer alan İslandiyada həkimlər saatda 98 dollar qazanır. Avstraliyada bu rəqəm 96, Finlandiyada 91, İrlandiyada 90, Danimarkada 89, Belçikada isə 88 dollardır.

Avropanın digər aparıcı ölkələrində də saatlıq qazanc kifayət qədər yüksəkdir. Almaniyada həkimlərin saatlıq gəliri 81 dollar, Böyük Britaniyada 79 dollar, Fransada 74 dollar, İtaliyada isə 73 dollar göstərilib.

Polşada saatlıq qazanc 29 dollar, Türkiyədə 30 dollar, Gürcüstanda isə 58 dollar təşkil edir.

Azərbaycanda bir həkim saatda nə qədər qazanır?

Əgər həkimin ay ərzində orta hesabla 176 saat işlədiyi qəbul edilərsə, aylıq 1 850 manatlıq maaşla saatda təxminən 10,5 manat, təxminən 6,2 dollar edir.

Təqdim olunan beynəlxalq siyahıdakı göstəricilərlə müqayisədə Azərbaycanda həkimin təxmini saatlıq qazancı ABŞ-dakı 129 dollarlıq göstəricidən təxminən 21 dəfə aşağıdır. Başqa sözlə, ABŞ-də həkimin bir saatlıq qazancı Azərbaycanda orta həkim maaşının təxminən 3 həftəlik qazancına bərabərdir...

Təqdim olunan statistikaya əsasən, həkimlərin illik gəlirlər belədir:

Yer	Ölkə	İllik maaş
1	ABŞ	268 083 $
2	İsveçrə	266 900 $
3	Lüksemburq	260 700 $
4	Bermud adaları	235 787 $
5	İslandiya	202 900 $
6	Avstraliya	199 071 $
7	Finlandiya	189 000 $
8	İrlandiya	187 000 $
9	Danimarka	185 400 $
10	Belçika	183 120 $
11	Kanada	181 623 $
12	BƏƏ	178 500 $
13	Honq Konq	173 900 $
14	Niderland	171 400 $
15	Norveç	170 900 $
16	Avstriya	170 700 $
17	Yeni Zelandiya	168 900 $
18	Almaniya	168 700 $
19	Baham adaları	165 263 $
20	Böyük Britaniya	163 200 $
21	Sinqapur	161 300 $
22	Fransa	155 000 $
23	İtaliya	151 500 $
24	İsrail	142 400 $
25	Yaponiya	142 000 $
26	Malta	128 400 $
27	Tayvan	123 700 $
28	İspaniya	123 600 $
29	Gürcüstan	121 000 $
30	Səudiyyə Ərəbistanı	116 300 $
31	İsveç	112 200 $
32	Portuqaliya	98 200 $
33	Yunanıstan	97 900 $
34	Panama	97 151 $
35	Çin	92 600 $
36	Slovakiya	90 600 $
37	Cənubi Koreya	87 700 $
38	Cənubi Afrika	86 500 $
39	Çexiya	85 100 $
40	Estoniya	83 200 $
41	Litva	80 100 $
42	Kosta Rika	78 300 $
43	Qvatemala	76 100 $
44	Çili	74 310 $
45	Ekvador	72 600 $
46	Latviya	71 200 $
47	Malayziya	64 200 $
48	Macarıstan	63 200 $
49	Türkiyə	63 100 $
50	Uruqvay	63 100 $
51	Bolqarıstan	63 090 $
52	Xorvatiya	62 622 $
53	Rumıniya	62 300 $
54	Polşa	61 400 $
55	Trinidad və Tobaqo	57 900 $
56	İraq	56 700 $
57	İndoneziya	55 400 $
58	Braziliya	51 984 $
59	Tailand	50 900 $
60	Vyetnam	46 900 $
61	Yamayka	46 800 $
62	Meksika	44 700 $
63	Ukrayna	42 600 $
64	Rusiya	41 300 $
65	Mərakeş	40 900 $
66	Peru	40 500 $
67	Kolumbiya	38 500 $
68	Qazaxıstan	35 800 $
69	Bosniya və Herseqovina	35 425 $
70	Hindistan	31 200 $
71	Dominikan Respublikası	24 900 $
72	Filippin	22 700 $
73	Argentina	21 089 $
74	Pakistan	18 600 $
75	Misir	15 900 $
76	Azərbaycan	təxminən 13 060 $*
77	Belarus	12 566 $