Menu

Gələn il sosialyönümlü xərclərdə növbəti artımlar olacaq - Nazir rəqəmləri açıqladı

17.11.2026, 17:10
Gələn il sosialyönümlü xərclərdə növbəti artımlar olacaq - Nazir rəqəmləri açıqladı

Dövlət və icmal büdcələri gələn il də sosialyönümlü olacaq, əhalinin sosial müdafiəsi və məşğulluq imkanlarının daha da gücləndirilməsi üçün ciddi maliyyə təminatı yaradacaq.

"AzPolitika" Əmək və Əhalinin Sosial Müdafiəsi Nazirliyinə istinadən xəbər verir ki, bunu nazir Anar Əliyev Milli Məclisin bu günkü plenar iclasında sosial sahə ilə bağlı gələn ilin büdcə layihələri barədə məlumat verərkən bildirib.

O, Prezident İlham Əliyevin rəhbərliyi ilə həyata keçirilən islahatlar nəticəsində vətəndaş rifahının təminatı sahəsində ardıcıl və məqsədyönlü tədbirlərin həyata keçirildiyini vurğulayıb. Dövlətimizin başçısı tərəfindən verilmiş tapşırığa uyğun olaraq, sayca 6-cı sosial islahat paketi ilə bağlı 2027-ci ilin dövlət və icmal büdcəsində müvafiq maliyyə təminatı yaradıldığını qeyd edib.

Nazir 2027-ci ilin dövlət büdcəsində sosial xərclərin 222,7 milyon manat və ya 1,7 faiz çox olmaqla 13 milyard manat, sosialyönümlü xərclərin 1,6 milyard manat və ya 9,2 faiz çox olmaqla 18,7 milyard manat nəzərdə tutulduğunu qeyd edib. Bildirib ki, sosialyönümlü xərclərin növbəti ilin dövlət büdcəsindəki çəkisinin cari illə müqayisədə 3,1 faiz artaraq 44,2 faiz, ÜDM-də payının isə 1 faizə yaxın artaraq 13,3 faiz təşkil edəcəyi proqnoz edilir.

Anar Əliyev Dövlət Sosial Müdafiə Fondunun (DSMF) 2027-ci il üçün gəlirlərinin 2026-cı il üzrə təsdiq olunmuş gəlirlərdən 897,4 milyon manat və ya 10,8 faiz çox olmaqla 9 milyard 221 milyon manat, 2027-ci il üzrə xərclərinin isə 2026-cı il üzrə təsdiq olunmuş xərclərindən 789,5 milyon manat və ya 9,3 faiz çox olmaqla 9 milyard 273 milyon manat olmasının proqnozlaşdırıldığını qeyd edib.

O, DSMF-nin gələn il üzrə xərclərinin 96,5 faizinin və ya 8 milyard 950 milyon manatının əhaliyə ödənişlərin payına düşəcəyini, bu göstəricinin 2025-ci illə müqayisədə 1,7 milyard manat, 2026-cı illə müqayisədə isə 753,6 milyon manat çox olduğunu vurğulayıb. Bildirib ki, hazırkı proqnoz göstəricilərinə əsasən 2027-ci ildə pensiyaların təqribən 7,5 faiz səviyyəsində indeksləşdirilməsi, bu məqsədlə 575,5 milyon manat vəsaitin ayrılması proqnoz edilir.

Nazir sosial müdafiə sahəsində aparılan islahatlar çərçivəsində əhaliyə göstərilən xidmətlərin rəqəmsallaşdırılması və vətəndaş məmnunluğunun təmin edilməsi istiqamətində görülən işləri vurğulayıb. Bu işlərin nəticəsi olaraq cari ilin iyun ayında DSMF-nin “Hamı üçün inklüziv və ədalətli sosial təminat xidmətləri” təşəbbüsü nominasiyası üzrə BMT-nin Dövlət Xidmətləri Mükafatına layiq görüldüyünü, həmin mükafatın dövlət xidmətləri sahəsində beynəlxalq səviyyədə qəbul olunan ən nüfuzlu mükafat olduğunu diqqətə çatdırıb.

Anar Əliyev həmçinin 2027-ci ildə işsizlikdən sığorta fondunun gəlirlərinin 2026-cı ilin təsdiqlənmiş göstəricisindən 30,6 milyon manat və ya 12,8 faiz çox olmaqla 268,9 milyon manat, fondun xərclərinin isə cari ilin təsdiqlənmiş göstəricisindən 52,8 milyon manat və ya 19,8 faiz çox olmaqla 319,2 milyon manat həcmində olmasının proqnoz edildiyini bildirib. Qeyd edib ki, gələn il işsizlikdən sığorta fondunun vəsaiti hesabına 444 min şəxsin aktiv məşğulluq tədbirlərinə cəlb olunması gözlənilir.

Nazir icbari tibbi sığorta fondunun 2027-ci il üçün gəlirlərinin 2026-cı il üzrə təsdiq olunmuş gəlirlərdən 281,2 milyon manat və ya 14,2 faiz çox olmaqla 2 milyard 257 milyon manat, fondun gələn ilki xərclərinin isə cari ilin təsdiqlənmiş göstəricisindən 358,7 milyon manat və ya 13,7 faiz çox olmaqla 2 milyard 980 milyon manat həcmində proqnoz edildiyini bildirib.

O diqqətə çatdırıb ki, icbari tibbi sığorta sisteminin tam rəqəmsallaşdırılması, sığortaolunanların vahid elektron reyestrinin yaradılması, tibbi-ekspertiza prosesinin avtomatlaşdırılması, icbari tibbi sığorta sisteminin maliyyələşmə mexanizminin daha da gücləndirilməsi və keyfiyyətə əsaslanan tibbi xidmətlərin maliyyələşmə modelinin qurulması qarşımızda duran əsas vəzifələrdəndir.

Şərhlər

Telegram-da bizə qoşulun
Ən vacib xəbərlər birinci sizdə — pulsuz, reklamsız.
Abunə ol