ZAKİR HƏSƏNOV DSX RƏHBƏRLİYİNƏ KİMİ GƏTİRMƏK İSTƏYİR? – Klanlararası çəkişmə
ORDUDAKI YENİ KLANIN İNKİŞAF PLANLARI
Azərbaycan Ordusunda formalaşmaqda olan yeni klan özünün nüfuz dairəsini digər güc strukturlarına doğru genişləndirmək niyyətindədir. Hazırda əsas hədəf Dövlət Sərhəd Xidmətidir.
Bu barədə AzPolitika.info-ya hərbiyə yaxın mənbələrdən məlumat daxil olub.
9 oktyabr prezident seçkilərindən sonra hökumətin yenidən formalaşdırılması zamanı adı namizədlər sırasında çəkilmədiyi halda müdafiə naziri təyin olunan və rəsmi-qeyri rəsmi geniş səlahiyyətlər əldə edərək Azərbaycan Ordusunda köklü dəyişikliklərə başlayan Zakir Həsənov, qısa müddət ərzində Müdafiə Nazirliyini “köhnələrdən” təmizləyib öz komandasını iş başına gətirməyə nail oldu. Lakin əldə olunan məlumatlara görə, Zakir Həsənov və onu himayə edən dairələr təkcə Milli Ordunu nəzarət altına almaqla kifayətlənmək niyyətində deyillər. Siyasi rəhbərliyin böyük etimadını hiss edən yeni nazir, MN-lə yanaşı Silahlı Qüvvələrin digər bölmələrini də özünün nüfuz dairəsinə daxil etməyə can atır. Əsas hədəf isə Sərhəd Qoşunlarıdır.
Bizə verilən məlumata görə, Zakir Həsənov Dövlət Sərhəd Xidmətinin rəhbərliyinə özünə yaxın bir şəxsi təyin etdirmək üçün bütün gücünü səfərbər edib. Söhbət Dövlət Sərhəd Xidmətinin Akademiyasının rəisi general-mayor Araz Məmmədovdan gedir. Z.Həsənovun DSX rəhbərliyində görmək istədiyi şəxs Araz Məmmədovdur.
Bizə verilən məlumata görə, hazırda da Elçin Quliyevlə münasibətləri məsafəli olan Araz Məmmədov, Zakir Həsənovun dəstəyi sayəsində DSX rəhbərliyinə real namizədə çevrilib. Hətta deyilənə görə bu yaxınlarda Heydər Əliyev Fondunun təşkil etdiyi bir tədbirə Elçin Quliyev dəvət olunmadığı halda Araz Məmmədov dəvətlilər sırasında olub və Zakir Həsənovla yanaşı əyləşib.
Murad MƏMMƏDOV
AzPolitika.info
Foto: Araz Məmmədov
Son yazılar
Şərhlər
Hər hansısa bir şərh yazılmayıb.