BİZİM VƏZİFƏLİ XƏSTƏLƏRİMİZ

Dərc olunub: 09/03/2017 - 10:56

Etibar EliyevEtibar ƏLİYEV

Azərbaycan Tibb Universitetinin Tədris Cərrahiyyə Klinikasına getmişdim. İynə atsan yerə düşməzdi. Xəstələrin sosial mənşəyini ayırd etmək üçün, sadəcə, kənarda dayanıb azacıq müşahidə aparmaq lazım idi. Müayinə və müalicə qiymətlərinin od tutub yandığı bu tibb məkanında daha çox kasıb təbəqədən olan xəstələri görmək mümkündür.

Buranı “resepşin” və mühafizə xidməti idarə edir. Ödəniş kağızın yoxdursa, yuxarı qatlara qalxa bilməzsən. Həkimin oturduğu mərtəbəyə daxil olmaq pulludur yəni. Yəni hər şey ödənişdən başlayır. Bəlkə adamın məsləhətə də ehtiyacı yoxdur, nəinki müayinə və müalicəyə, bəs nəyə görə öncədən pul alırlar ondan? Bəlkə həkim deyəcək ki, get başqa doktor axtar?!

Yuxarıda dedim axı, müayinə və müalicə qiymətlərinin od tutub yandığı bu tibb məkanında əsasən kasıb təbəqədən olan xəstələri görmək mümkündür. Bəs nə əcəb varlılar gəlmir bura? Pul problemləri yoxdursa, onlar niyə gəlmirlər bu mərkəzə? Niyə qane etmir onları bu klinika? Xidmətin keyfiyyətimi?

Ən qəribəsi odur ki, varlıların gəlmədiyi bir klinikada qiymətlər varlılar üçündür. Nə yaxşı ki, belə yaraşıqlı tibb müəssisələrində Türkiyədə oxumuş bir neçə həkim çalışır. Hiss edirsən ki, onlar da yüksək xidmət haqlarından sıxıntı keçirirlər. Nisyə müayinə də yoxdur. Adama heç 10 damcı “Karvalol” da verməzlər. Pulsuz koridora buraxmırlarsa, hər şey aydın olmalıdır. Elə bil, başqa dövlətin sərhədlərini keçirsən bura gələndə.

Yeni, müasir və elitar Tədris Cərrahiyyə Klinikasının “sərhəd buraxılış xəttində” yadıma bir şey düşdü. Bir neçə gün öncə sosial şəbəkələrdə vəzifəli şəxslərdən birinin xəstələnməsi xəbərini oxudum: “Azərbaycan baş nazirinin müavini Abid Şərifov xüsusi reyslə İsrailə aparılıb. Lent.az İsrail mediasına istinadən xəbər verir ki, o, Hayfa şəhərində RAMBAM klinikasında təcili müalicəyə qəbul edilib. A.Şərifov İsrailə ürəkdəki elektrik keçiriciliyinin ciddi pozuntuları diaqnozu ilə aparılıb və adı çəkilən klinikanın kardioloji şöbəsinə yerləşdirilib”.

Xüsusi reys, İsrail klinikası… Bəs görəsən, burdakı elitar klinikalara Abid müəllimin ürəyini (qəlbini də yazmaq olar) niyə etibar etməyiblər?

Yadıma bir hadisə düşdü. 2013-cü ilin fevralın 9-da Azərbaycan Milli Elmlər Akademiyasının sabiq prezidenti, akademik Mahmud Kərimov axşam saatlarında kəskin ürək tutması ilə xəstəxanaya çatdırılıb. Lakin vəziyyəti ağır olduğundan onu xüsusi təyyarə ilə Türkiyəyə aparıblar. Lakin M.Kərimov yolda ikən dünyasını dəyişib.

Belə hallar da olur, yoldaşlar.

Abid müəllimin xəstəliyi ilə bağlı Publika.az saytındakı xəbərə diqqət edək: “Azərbaycanın Baş nazirinin müavini Abid Şərifov hazırda iş başındadır. Bunu onun xidməti telefonuna cavab verən köməkçisi bildirib. O, adını söyləmək istəmədiyini və Abid Şərifovun səhhəti ilə bağlı yayılan xəbərlərin yalan olduğunu söyləyib: “Hazırda Abid müəllim iş başındadır. Onun səhhəti ilə bağlı yayılan xəbərlər yalandır”.

Bunlar xaricdə müalicələrini də gizlətməyə çalışırlar. Hətta köməkçi adını da gizlədir. Nə yaxşı ki İsrail saytlarından biri bu məlumatı yazdı. Yoxsa elə biləcəkdik ki, Abid müəllim burda dəbdəbəli klinikaların birində müalicə olunub.

Televiziyalar klinikaları var gücləri ilə təbliğ edirlər. Ancaq bizim vəzifəlilərin (varlıların) hər hansı birinin yerli klinikada müalicəsinin reklamı, əlbəttə ki, klinikanın nüfuzunu yüksəldə bilər. İndi təsəvvür edin ki, belə bir reklam gedir: “Baş nazirin müavini filankəsov filankəs ürəyini İsrailin istənilən klinikasında müalicə etdirmək imkanına sahib olsa da, “Neftçilər” xəstəxanasına etibar elədi”.

Bizim əbədi şeyximiz Allahşükür Paşazadə hər il qanvermə kampaniyasına qoşulur. Bu, çox yaxşı haldır. Qanı bizim yerli klinikalarda verir. Yəni onlara etibar edir. Ancaq xatırlayıram ki, bir dəfə hava limanında, o, müsahibə verirdi ki, xaricdən müalicədən gəlir.

Tibb Universitetinin Tədris Cərrahiyyə Klinikasından çox bədbin ayrıldım. Xəstələri dərdlərinə əlac tapılmasından çox qiymətlər narahat edir. Müayinə, müalicə, dərman. Hamısı qanı qiymətinə. Tibbi sığorta tətbiq olunmayana qədər vətəndaşlardan əməkhaqqısı barədə arayış istənilməlidir. Məsələn, bir elmi işçinin, yaxud ali məktəb müəlliminin 1 aylıq əməkhaqqı bu klinikada müalicə, müayinə və dərmana bəs etməz.

Çalışın xəstələnməyəsiniz…


loading...




Fikrinizi bildirin