2011-2016-cı illərdə Dövlət Şəhərsalma və Arxitektura Komitəsinin sifarişi ilə “Böyük Bakının Regional İnkişaf Planı” və onun əsasında “Bakı şəhərinin Ərazidən İstifadə və Zonalaşdırma Planı”nın layihəsi hazırlanıb.
"Report" xəbər verir ki, bu barədə Komitənin açıqlamasında bildirilir.
Məlumatda həmçinin deyilir ki, “Bakı şəhərinin Ərazidən İstifadə və Zonalaşdırma Planı” paytaxtın Baş Planı kimi təqdim edilsə də, onun aidiyyəti üzrə razılaşdırılması tamamlanmayıb, sənədi Nazirlər Kabineti təsdiq etməyib.
Baş Planın əsas şəhərsalma sənədi olduğunu və paytaxtın sistemli və davamlı inkişafı üçün strateji əhəmiyyət daşıdığını nəzərə alaraq, Komitə başlanılmış işlərin sona çatdırılmasına xüsusi önəm verir. Baş Planın hazırlanması istiqamətində bu günədək görülmüş işlər dərindən araşdırılaraq, hərtərəfli qiymətləndiriləcək.
Bu qiymətləndirmə başa çatdıqdan sonra Baş Planın hazırlanması işləri davam etdiriləcək, həmin sənədin şəhərsalma qanunvericiliyinin tələblərinə tam cavab verməsi və aparıcı dünya təcrübəsinə uyğunluğu təmin ediləcək. Bu prosesə yerli mütəxəssislərlə yanaşı nüfuzlu beynəlxalq ekspertlərin də cəlb olunması planlaşdırılır.
Baş Planın hazırlanması işi tam həcmdə yekunlaşdıqdan sonra, sənəd aidiyyəti təşkilatlarla razılaşdırılacaq və təsdiq olunması üçün Nazirlər Kabinetinə təqdim olunacaq.
Şərhlər
Bakının hər tərəfi mağara təfəkkürlü inşaatçıların işğalına məruz qalıb.Ayaqyolu boyda yer tapan kimi oranı dərhal tikinti meydançasına çevirirlər.Əhali də ki aldığı mənzilin harada yerləşdiyini,həyətin dar olduğunu və digər yarıtmaz şəraiti nəzərə almır.Elə şirkətlər var , Azadlıq prospektində belə inşaat əxlaqını gözləməmiş,birinci mərtəbədən sonra avtomobil yolunun üzərinə qədər genişləndirmə aparmışdır.Bu da ondan irəli gəlir ki,tikinti yerləri hətta vaxtı ilə çoban işləyən savadsızlara da satılmışdır.