BAKIDA RƏSMƏN ƏZİZOV DÖVRÜ BAŞLADI! - Prezident onu BŞİH başçısı təyin etdi

Azərbaycan Prezidenti İlham Əliyev Bakı Şəhər İcra Hakimiyyəti başçısının təyin edilməsi haqqında sərəncam imzalayıb.

Sərəncama əsasən Eldar Əziz oğlu Əzizov Bakı Şəhər İcra Hakimiyyətinin başçısı təyin edilib.

Xatırladaq ki, Eldar Əzizov bu ilin 16 iyul tarixində Bakı Şəhər İcra Hakimiyyəti başçısının birinci müavini təyin olunmuş, başçı olmadığı üçün onun da səlahiyyətlərini icra etməyə başlamışdı. Belə qısa müddətdən sonra onunla bağlı ikinci sərəncamın verilməsi Prezidentin yüksək etimadından xəbər verir. Belə görünür ki, E.Əzizov cəmi 4 ay ərzində qarşıya qoyulan tapşırıqları icra edə biləcəyinə dair inam formalaşdıra bilib. 

E.Əzizovun bugünkü təyinatı ilə Bakı meri olmaq uğrunda hakimiyyətdaxili klanların, qruplaşmaların illərdir apardıqları mübarizə də bitmiş oldu. Düzdür, BŞİH başçısının səlahiyyətlərinin bir xeyli məhdudlaşdırılmasından sonra bu mübarizə az da olsa səngimişdi. Lakin istənilən halda bu post strateji əhəmiyyətini qoruyur və səlahiyyətləri nə qədər məhdud olsa da, klanlar onun uğrunda mübarizədən geri çəkilməmişdilər. Təkcə bir faktı qeyd etmək kifayətdir ki, BŞİH başçısı Təhlükəsizlik Şurasının üzvüdür.

E.Əzizovun bu posta təyin olunması isə gözlənilməz deyildi. Onun şansını artıran bir neçə üstünlüyü var idi.

Əvvəla, E.Əzizovla Prezident İlham Əliyevin hələ uşaqlıq illərindən tanış olduqları məlumdur.

İkincisi, E.Əzizov hakimiyyətdaxili qruplaşmalarda iştirak etməyib və Prezidentə şəxsən bağlı kadrdır.

Üçüncüsü, icra hakimiyyəti postunda çoxillik təcrübəsi var - ölkənin ikinci və üçüncü böyük şəhərlərinə illərlə rəhbərlik edib.

Dördüncüsü və ən əsası, son illərin kadr siyasətinə tamamilə uyğun gələn bir tipdir - Bakıda doğulub və rusdillidir...

İstənilən halda, Bakıda çoxillik Hacıbala xəcalətindən sonra Eldar Əzizov dövrünün başlanması yaxşı hadisədir. 

Rasim ƏLİYEV

AzPolitika.info

***

Qeyd edək ki, Əzizov Eldar Əziz oğlu 1957-ci il iyun ayının 28-də Bakı şəhərində anadan olub. 1979-cu ildə S.M.Kirov adına Azərbaycan Dövlət Universitetinin tarix fakültəsini fərqlənmə diplomu ilə bitirib. Həmin ildən Azərbaycan Komsomolu Mərkəzi Komitəsində müxtəlif məsul vəzifələrdə çalışıb.

1984-cü ildən Bakı şəhəri 26 Bakı Komissarları rayonunun komsomol komitəsinin birinci katibi, 1987-ci ildən isə Bakı şəhər komitəsinin birinci katibi vəzifələrində çalışıb.

1989-cu ildən Azərbaycan Komsomolu Mərkəzi Komitəsinin katibi vəzifəsinə seçilib. 1991-ci ildən Azərbaycan Gənclər İttifaqı Mərkəzi Komitəsinin katibi vəzifəsində işləyib.

1990-cı ildə Azərbaycan Respublikasının Ali Sovetinə deputat seçilib.

1998-ci ildən Azərbaycan Respublikası Mərkəzi Seçki Komissiyasında beynəlxalq əlaqələr şöbəsinin müdiri, 1999-cu ildən Bakı Şəhər İcra Hakimiyyətində Xarici Əlaqələr və İnvestisiya Proqramları Departamenti sədrinin birinci müavini, 2000-ci ilin mart ayından Bakı Şəhər İcra Hakimiyyəti başçısının müavini vəzifələrində çalışıb.

2000-ci ilin iyun ayından Bakı şəhəri Nizami Rayon İcra Hakimiyyətinin başçısı vəzifəsinə təyin olunub.

2003-2011-ci illərdə Gəncə Şəhər İcra hakimiyyətinin başçısı vəzifəsinə təyin olunub.

2011-2015-ci illərdə Sumqayıt Şəhər İcra Hakimiyyətinin başçısı olub.

2015-ci ilin sentyabr ayında Bakı şəhəri Səbail Rayon İcra Hakimiyyətinin başçısı vəzifəsinə təyin olunub.

Azərbaycan Respublikasının Prezidenti cənab İlham Əliyevin 16 iyul 2018-ci il tarixli sərəncamı ilə Bakı Şəhər İcra Hakimiyyəti başçısının müavini vəzifəsinə təyin edilib.

1980-ci ildə “Şərəf nişanı”, 2017-ci ildə 2-ci dərəcəli "Vətənə xidmətə görə" ordenləri ilə təltif edilib.

Azərbaycan Jurnalistlər Birliyinin üzvü, “Difai” kitabının və 200-dən artıq məqalənin müəllifidir. Dəfələrlə Bakı Şəhər Deputatlar Sovetinin üzvü seçilib.

Ailəlidir, 2 övladı var.