Ağstafa rayon İcra başçının müavini, eyni zamanda İctimai-siyasi və humanitar məsələlər şöbəsinin müdiri Lalə Eyyubova DTX-nin ötən gün keçirdiyi əməliyyatda həbs olunduğu haqda xəbərləri bu gün təkzib edib.

O, unikal.org-a açıqlamasında deyib ki, yayılan məlumatlar həqiqəti əks etdirmir:“Mənim baş verən prosseslərlə heç bir bağlılığım yoxdur. Nə istintaqa çağırılmışam, nə də ki, həbs olunmuşam. Mən işimin başındayam. Hazırda başçının müavini vəzifəsini icra edirəm”.

Qeyd edək ki, AzPolitika.info-ya verilən məlumata görə, Lalə Eyyubova baş nazirin birinci müavini Yaqub Eyyubovun qardaşı nəvəsidir.

DTX ötən gün Ağstafada əməliyyat keçirərək icra hakimiyyətinin başçısı Nizaməddin Quliyevi və onun müvini Ramiz Tatarovu həbs edib. Onlar büdcə pullarını mənimsəməkdə, sahibkarlardan və kənd icra nümayəndələrindən rüşvət toplamaqda, digər qanunsuz əməllər törətməkdə ittiham olunurlar.

 “Turan” agentliyinin məlumatına görə isə Lalə Eyyubova da dünən saxlanılanlar arasında olub. Onun lazımı izahatlar alındıqdan sonra buraxıldığı ehtimal edilir.  Eyyubova ilə bağlı hansı qərarın veriləcəyinin isə istintaqın gedişi zamanı ortaya çıxan faktlardan asılı olacağı bildirilir. 

 AzPolitika.info