"Daha güclü Azərbaycan naminə səs verin!" – Hakim partiyanın namizədi (FOTO, VİDEO)

37 saylı Nizami Birinci (Gəncə) Seçki Dairəsindən deputatlığa namizəd Pərvin Kərimzadənin parlament seçkilərinin təbliğat-təşviqat kampaniyası çərçivəsində seçicilərlə görüşləri davam edir. Növbəti görüş ağsaqqalların, ziyalıların, Qarabağ və Əfqanıstan müharibəsi veteranlarının, seçki dairəsini əhatə edən ərazidə məskunlaşan məcburu köçkünlərin, gənclərin, ictimaiyyət nümayəndələrinin iştirakı ilə keçirilib.

Namizədin Seçki Qərargahından “AzPolitika-info”-ya verilən məlumata görə, tədbiri açan Təbliğat Qrupunun üzvü, Gəncə Tibb Kollecinin direktoru Mehman Rzayev YAP-ın parlament seçkilərinə böyük inamla getdiyini, bu seçkilərdə qələbə qazanacağına əmin olduğunu bildirib. Pərvin Kərimzadənin tərcümeyi-halı, elmi-siyasi fəaliyyəti, ötən 5 ilə yaxın müddət ərzində millət vəkili kimi gördüyü işlər haqqında ətraflı məlumat verib. Deyib ki, 37 saylı Nizami birinci (Gəncə) Seçki Dairəsindən deputatlığa namizədin növbəti dəfə Pərvin Kərimzadə olması Yeni Azərbaycan Partiyasının ona olan etimadının nümunəsidir.

Görüşdə çıxış edən məcburu köçkünlər, Qarabağ müharibəsi veteranları, Əfqanıstan müharibəsi veteranları, sakinlər namizədə uğurlar diləyib, parlament seçkilərində YAP-ın namizədinə səs verəcəklərini bildiriblər.

Aprel şəhidi, kapitan İnqilab Quliyevin atası Çingiz Quliyev çıxış edərək, Yeni Azərbaycan Partiyasının namizədlərinin arxasında nəhəng siyasi gücün, 750 minə yaxın insanın siyasi iradəsi dayandığını qeyd edib, qarşıdan gələn növbədənkənar parlament seçkilərində seçicilərin birmənalı olaraq səslərini hakim partiyanı təmsil edən namizədlərə verəcəklərini bildirib.

Pərvin Kərimzadə görüşə gəldikləri üçün seçicilərə təşəkkür edib, seçkilərdə ulu öndər Heydər Əliyevin qurucusu olduğu partiyanın namizədi kimi iştirak etdiyi üçün fəxr hissi keçirdiyini vurğulayıb. O, V çağırış Milli Məclisin deputatı kimi fəaliyyətindən, qarşıda duran vəzifələrdən danışıb, seçicilərini inkişafa, yeniliyə, ictimai-siyasi sabitliyə - daha güclü Azərbaycan naminə Yeni Azərbaycan Partiyasına və onun namizədlərinə səs verməyə çağırıb.

“AzPolitika.info”