“Hamının rahat hesab etdiyi canlı öyrənmə mühitini bu gün bizdən asılı olmayan səbəblərdən təşkil edə bilmirik. Ona görə də cəmiyyətdə bəzən elə düşünülür ki, canlı təhsildən distant təhsilə keçilir. Böhran vəziyyətində öyrənmək üçün mümkün olanı edirik”.
“Report” xəbər verir ki, bunu təhsil naziri Emin Əmrullayev deyib.
Nazir bildirib ki, onlayn təhsil tədrisin tamam başqa formatıdır: “İlk gündən başa düşürdük ki, kompüter və internet problemi olacaq. Bu səbəbdən də teledərslər layihəsini seçdik. Zaman az olsa da, teledərslər daha əlçatandır və orada ən bacarıqlı müəllimlər dərs deyir. Problem interaktivlə bağlıdır, yəni şagirdlər suallarını rahat verə bilmirlər. Böyük şəhərlərdə təxminən 74-75 % təhsilalanı qeydiyyatdan keçirib onlayn təhsilə cəlb edə bilmişik. Yerdə qalanlar bizim üçün də problemdir”.
E.Əmrullayev xatırladıb ki, ölkədə 1 milyon 500 min şagird var: “Amma etiraf edək ki, Azərbaycan bazarında heç bu qədər sayda kompüter satışda yoxdur. Bu qədər şagirdi kompüterlə təmin etsək belə, problem öz həllini tapmayacaq, əksinə bizim daha ciddi problemlərimiz olacaq. Odur ki, ictimai müzakirəyə açıq olmalıyıq ki, düzgün strategiya seçək”.
Şərhlər
Cənab nazir, bu gün rus dilində 4cü sinif riyaziyyat teledərsinin bir hissəsini izlədim. 2400-1845=595 yazısını görəndə çox təəccübləndim, dedim yəqin kiçik bir səhvdir desin davamında düzəldirlər. Amma tam əksinə hesablamanın yoxlama hissəsində də 1845+595=2400 yazdılar. Eyni səhvi təkrar təkrar yayıldılar. Heç bir iş asan deyil, xüsusilə bu qədər qısa vaxtda bu qədər teledrs hazırlamaq isə heç asan deyil bunu başa düşürəm. Amma bu teledərslərə nəzarət edən kimsə yoxdur? Yayından əvvəl kimsə bunlara baxmır? Baxırsa bu ciddi səhv niyə uşaqlarımıza öyrədilir?!!!!