RUSLAR BU ŞƏHƏRDƏ DARMADAĞIN EDİLDİ, GENERAL ÖLDÜRÜLDÜ - İşğalçı mülki əhalini bombaladı + VİDEOLAR

Ukrayna ordusu və xalqı işğalçılara qarşı mübarizəni davam etdirir. Ötən gün axşam Nikolayev şəhərində gedən ağır artilleriya döyüşləri nəticəsində Rusiya ordusuna ağır zərbə vurulub. Ukrayna mediasının məlumatına görə, şəhərdəki Rusiya bölmələri darmadağın edilib. Rus silahlı qüvvələri daxil olduqları vilayətin bir neçə kəndindən tamamilə çıxarılıb.

Artilleriya zərbələri nəticəsində vilayətin və Nikolayev şəhərinin bir sıra yaşayış hissələri dağıntılara məruz qalıb.

Ruslar isə Nikolayev şəhərindəki Ukrayna bazasını raket vurublar.  Nikolayevdəkı hərbi baza tamamilə dağılıb. Dağıntılar altında da çox sayda əsgərin qaldığı bildirilib. 

Ukrayna ordusu hücumla bağlı şərh verməsə də, Nikolayevin meri Oleksandır Senkeviç hücumdan əvvəl sirenləri işə salmağa vaxt olmadığını və raketlərin yaxınlıqdakı Xersondan atıldığını qeyd edib.

Nikolayev vilayətinin rəhbəri Vitali Kim bildirib ki, işğalçılar hərbçilərin olduğu kazarmanı səhərə yaxın, onların yatdığı vaxtda xaincəsinə vurublar. 

Kiyev vilayətində Makarov kəndinə minaatanların endirilməsi nəticəsində 7 nəfər həlak olub, daha 5 nəfər yaralanıb. Bu barədə Kiyev vilayətinin polis idarəsinin mətbuat xidməti məlumat yayıb.

"Martın 18-də işğalçılar Buçanski rayonunda yaşayış məntəqələrini ağır artilleriyadan atəşə tutublar. Düşmənin Makarovu atəşə tutması nəticəsində 7 dinc sakin həlak olub. 5 nəfər yaralanıb və xəstəxanadadır", - məlumatda deyilir.

Bildirilir ki, atəş nəticəsində yaşayış binaları dağılıb, inzibati bina və digər tikililərə ziyan dəyib. (UNİAN)

***

Rusiya Silahlı Qüvvələrinin Ukraynada itirdiyi qüvvələrin yeni sayı məlum olub. Bu barədə Ukrayna Silahlı Qüvvələrinin Baş Qərargahı feysbukda məlumat yayıb.

Bildirilib ki, indiyədək 14 400 hərbçi zərərsizləşdirilib.

Bundan başqa, hücum edən tərəfin 466 ədəd tankı, 1470 ədəd zirehli döyüş maşını, 213 ədəd artilleriya sistemi, 44 ədəd havadan müdafiə sistemi, 95 ədəd hərbi təyyarəsi, 115 ədəd helikopteri, 914 ədəd nəqliyyat vasitəsi, 3 ədəd gəmi/kater, 60 ədəd yanacaq çəni, 12 ədəd dronu məhv edilib.

“Məlumatlar daha dəqiq olur. Hesablama hərbi əməliyyatların yüksək intensivliyi ilə çətinləşir”, - məlumatda vurğulanıb.

Rusiyanın Ukraynaya təcavüzü nəticəsində 112 uşaq həlak olub, 140-dan çoxu yaralanıb. Bu məlumatı isə Ukraynanın Baş Prokurorluğu yayıb.

Bildirilib ki, ən çox zərər görən Kiyev, Xarkov, Donetsk, Çerniqov, Mikolayevsk, Jitomir, Sumı, Xerson vilayələtinin sakinləridir.

Məlumata görə, 489 təhsil müəssisəsi və yaşayış binasına zərər dəyib. Rusiya hərbçilərinin hücumu nəticəsində ən çox məktəb və uşaq bağıçası Donetsk (138), Xarkov (77), Kiyev (41), Mikolayevsk (39), Sumı (33), Xersonda (21) dağılıb.

Bildirilib ki, Rusiya hərbçilərinin fevralın 24-dən martın 18-dək apardıqları hərbi əməliyyat nəticəsndə 112 uşaq ölüb, 140-dan çox azyaşlı yaralanıb.

***

Amerika kəşfiyyatı Rusiya qoşunlarının Ukraynada bütün istiqamətlərdə hücumu dayandırdığını müşahidə edir. Bu barədə Pentaqonun adı açıqlanmayan yüksək çinli məmuru BBC-yə açıqlamasında deyib.

O bildirib ki, rus silahlılarının Kiyevə şimal, şimal-qərb, eləcə də 30 km aralıda yerləşdikləri şərq istiqamətindən irəliləyişi qeydə alınmır.

Pentaqon nümayəndəsinin sözlərinə görə, müdafiə xəttini yarmaq cəhdlərinə baxmayaraq, rus hərbçilərinin Xarkova yaxınlaşmasını müşahidə etmirlər, Çerniqov və Mariupol mühasirədə qalsa da, ukraynalıların şiddətli müqaviməti rus qoşunlarının işğalının qarşısını alır.

Amerika rəsmisi qeyd edib ki, Rusiyanın aerodromlara raket zərbələrinin artırılmasına baxmayaraq, Ukrayna öz təyyarələrinin əksəriyyətini döyüşə hazır vəziyyətdə saxlayır. Bundan əlavə, hava hücumundan müdafiə sistemləri Rusiya qırıcılarını və raketlərini vurmağa davam edir. Ona görə də Ukrayna üzərindəki hava məkanı tam olaraq rusların nəzarətində deyil.

Prezident Volodimir Zelenski də xalqa videomüraciətində bildirib ki, Ukrayna ordusu bir çox istiqamətlərdə Rusiya qoşunlarının qarşısını alıb. 

"Ukrayna Silahlı Qüvvələrinin cəsurluğu və hazırlığı sayəsində işğalçı qoşunların demək olar, bütün istiqamətlərdə fəaliyyəti dayandırıldı. Xarkov vilayətində çətin döyüşlər, xüsusə İzum yaxınlığında ağır hərbi əməliyyatlar gedirdi. Rus qoşunları hətta ora təlim mərkəzlərindən hərbçilər göndəriblər. Tam hazırlıqsız kontingent. Döyüşdə yarım saat belə dözə bilməyən insanlar”, - Prezident şənbə gecəsi videomüraciətində bildirib.

Zelenskinin sözlərinə görə, ordu Kiyev, Suma və Çerniqov vilayətlərində, eləcə də Ukraynanın cənubunda düşmənin qoşununu dayandırıb.

"Kiyev, Suma, Çerniqov vilayətlərində, ölkəmizin cənubunda ordu işğalçıları dayandırdı. Rusiya hərbçilərinin dövlətimizi ələ keçirmək üçün ilkin planı iflasa uğradı. Və hiss olunur ki, onlar bizimlə nə etmək mümkün olduğunu bilmirlər. Görünür, onların hərbi komandirləri siyasi liderlərinə bizi əldən salmaq, Ukraynanı tükəndirmək üçün qəddar və yanlış taktikadan başqa bir şey təklif edə bilmirlər”, - Zelenski əlavə edib.

Prezident qeyd edib ki, “onların (Rusiya -red) hərbçilərinin bu taktikası yalnız həmin ölkə üçün vəziyyəti gərginləşdirir.

“Ukrayna Silahlı Qüvvələri düşmənin işğal etdiyi ərazilərdəki qoşunlarına zərbə endirib”. Bu barədə isə Ukrayna Silahlı Qüvvələri Baş Qərargahının yaydığı əməliyyat məlumatında bildirilib.

Məlumata görə, Ukraynanın zenit-raket qoşunları və aviasiyasının qırıcıları Rusiyanın 12 hava hədəfini – 2 qırıcı, 3 helikopter, 3 PUA və 4 qanadlı raketini məhv edib:

“Ötən sutka ərzində Ukraynanın Silahlı Qüvvələri işğalçının Mikolayevsk və Sumıl vilayətlərində bir neçə texnika karvanını məhv edib. Düşmənin itkiləri dəqiqləşdirilir”.

Çernobaevka hava limanında (Xerson bölgəsi) Ukrayna hərbçiləri Rusiya Federasiyasının cənub hərbi dairəsinin ordusunun komanda məntəqəsini məhv edib, onun komandiri həlak olub. UNİAN-ın məlumatına görə, bu barədə brifinqdə Ukrayna prezident aparatı rəhbərinin müşaviri Aleksey Arestoviç məlumat verib.

“Rusların komanda məntəqəsi və təyyarə toplama məntəqəsi kimi istifadə etdikləri Çernobaevka aerodromu bizi bir daha nəticə ilə sevindirib. Ukrayna silahlı qüvvələri Çernobaevka hava limanına yenidən zərbələr endirib. İlkin məlumatlara görə, Rusiya Federasiyasının Cənub Hərbi Dairəsinin 8-ci ümumqoşun ordusunun komanda məntəqəsi məhv edilib”, - deyə Arestoviç bildirib.

Onun sözlərinə görə, bu, “LXR/DXR” “silahlı qüvvələrin” yaradılması və təchizatına cavabdeh olan istiqamət idi.

"Bu ordunun komandiri həlak olub." – Arestoviç əlavə edib.

Sonradan məlum olub ki, Çernobayevka aerodromunda Rusiya Silahlı Qüvvələrinin Cənub Hərbi Dairəsinin 8-ci Birləşmiş Silahlı Qüvvələrinin komandiri, qvardiya general-leytenantı Andrey Mordviçev həlak olub.

Aleksey Arestoviçin sözlərinə görə, Rusiya Cənub Hərbi Dairəsinin 8-ci Əlahiddə Ümumqoşun Ordusunun komanda məntəqəsi komandirlə birlikdə məhv edilib.

Bu arada Rus ordusu Mariupoldakı “Azovstal” metallurgiya zavodunu ələ keçirməyə çalışır. Bu barədə Daxili İşlər Nazirinin müşaviri Vadim Denisenko məlumat verib.

Onun sözlərinə görə, rus ordusu metallurgiya zavodunu, demək olar, məhv edib.

"Mariupolda vəziyyət dəhşətlidir, indi "Azovstal" uğrunda döyüşlər gedir. Bizdə olan məlumatlara görə, deyə bilərik ki, biz bu iqtisadi nəhəngi itirmişik, Avropanın ən böyük zavodlarından biri faktiki olaraq məhv edilir", - deyə Denisenko bildirib.

Ukrayna Müdafiə Nazirliyinin məlumatına görə, Ukrayna ordusu Azov dənizinə çıxışı itirib.  Əməliyyat xülasəsində ölkənin Silahlı Qüvvələrinin Azov dənizinə çıxışını itirdiyi qeyd olunub.

“Rusiya ordusu qismən Donetsk əməliyyat zonasında uğur əldə edib. Onlar müvəqqəti olaraq Ukraynanı Azov dənizinə çıxışdan məhrum ediblər”, - deyə Ukrayna Müdafiə Nazirliyinin əməliyyat hesabatında qeyd olunub.

Ukraynanın Nikolayevi şəhəri də Rusiya ordusu tərəfindən bombalanıb. Eyni vaxtda Xerson vilayətinin də atəşə məruz qalması Nikolaevdə həyəcan siqnalının işə düşməməsinə səbəb olub.

Nikolayev meri Aleksandr Senkeviç bildirib ki, Rusiya ordusu Ukrayna Silahlı Qüvvələrinə məxsus 79-cu hava desant-hücum briqadasının kazarmalarını atəşə tutub.

"Bizim hava hücumu xəbərdarlığımız yox idi, çünki Xerson rayonundan hücuma məruz qalmışdıq və sadəcə olaraq xəbərdarlıq sistemini işə salmağa vaxtımız yox idi. Bombardman sürətli baş verdi",- deyə rəsmi şəxs bildirib.