“AZPOLİTİKA.İNFO” – 10

"AzPolitika.info" saytı 10 il il əvvəl – 2012-ci il aprelində Azərbaycanın informasiya məkanında ənənəvi çap mediasının, televiziya və radio kanallarının hələ də dominant olduğu dövrdə yaranıb.

Bu, həmin dövr idi ki, media üçün intibah dövrü sayılan 90-cı illərdən Azərbaycan mətbuatında tanınmağa başlayan imzalar informasiya texnologiyalarının media sektorunda formalaşdırdığı yeni çağırışları qızğın müzakirə edirdi. Yeni reallıqlar cəmiyyət üçün lazımlı məlumatların çevik, operativ emalını və yayımını diqtə edirdi. Çünki sosial şəbəkələrin populyarlaşması, smartfonların, mobil internetin sürətli inkişafı insanların məlumatlara əlçatımlılığını dəfələrlə artırmaqla yanaşı onların özünü də informasiya yayımçısına çevirmişdi. Yəni rəqabət xeyli güclənməkdə idi və belə bir mühitdə print-media ilə uğur qazanmaq artıq mümkün deyildi.

Bu gün Azərbaycan informasiya məkanının geniş oxucu auditoriyasına, inam və etibarına sahib olan "AzPolitika.info" yeni dövrün çağırışlarını ilk qəbul edən resurslardandır. Keçən on ildə Azərbaycanda minlərlə sayt, portal təsis olunub, çalışıb, amma onların əksəriyyəti cəmiyyətin, oxucunun tələbatına cavab verə bilmədiyinə görə davam gətirə bilməyib. Çünki hazırkı informasiya bolluğu internet resursları üçün başlıca rəqibdir, ondan sonra digər rəqiblər gəlir. Bu məkanda ayaqda durmağın başlıca şərti oxucunun etibarı və inamıdır, qalan şərtlər onun ətrafında formalaşır və biri-birini tamamlayır.

Hər günün 20 saatı xəbər istehsal edən, təhlillər, jurnalist araşdırmaları, reportajlar hazırlayan və yayan "AzPolitika.info" minlərlə oxucu tərəfindən vərəqlənir. Bu zəhmətin qarşılığı kimi saytın şərh bölməsinə yazılan yüzlərlə şərhləri görmək, oxucu zənglərinə cavab vermək, ardı-arası kəsilməyən şikayət məktublarında qaldırlan problemləri araşdırıb dərc etmək, həllinə nail olmaq redaksiya kollektivinə mənəvi zövq verir.

"AzPolitika.info" cəmiyyət qarşısında bu missiyanı daha böyük şövqlə, əzmlə davam etdirmək niyyətindədir.