Ümumdünya Səhiyyə Təşkilatının (ÜST) baş direktoru Tedros Adhanom Qebreyesus, Çinin “sıfır Covid” siyasətinin davamlı olmadığını söylədikdən sonra Çinin Xarici İşlər Nazirliyi onu məsuliyyətsiz ifadələrdən çəkinməyə çağırıb.
“Reuters” xəbər verir ki, Pekində keçirilən ənənəvi mətbuat konfransında çıxış edən Xarici İşlər Nazirliyinin sözçüsü Zhao Lijian ölkəsinin pandemiya ilə mübarizə tədbirlərini müdafiə edib. O, ümid etdiyini bildirib ki, müvafiq şəxslər Çinin COVID siyasətinə obyektiv və rasional şəkildə baxacaq, faktlar haqqında daha çox məlumat əldə edəcək və məsuliyyətsiz açıqlamalar verməkdən çəkinəcək.
“Sıfır COVID” yanaşmasını müdafiə edən Zhao Lijian deyib ki, Çinin dinamik COVID siyasəti sıfır infeksiya həyata keçirməyə deyil, daha çox mümkün olan ən qısa müddətdə minimum sosial xərclə COVID-19-u nəzarət altına almağa yönəlib: “Çin hökuməti ölkənin milli reallıqlarına əsaslanaraq “sıfır COVID” siyasətini formalaşdırıb həyata keçirib, dəyişən şərtlər əsasında qarşısının alınması və nəzarət protokollarını düzəldir. Məqsəd yalnız insanların həyatını və sağlamlığını mümkün qədər qorumaq, davamlı, sağlam və sabit iqtisadi və sosial inkişafı dəstəkləməkdir”.
L.SƏMLA
AzPolitika.info
Şərhlər