RUSİYANIN İTKİLƏRİNDƏ ŞOK ARTIM - Baş Qərargah açıqladı (Yenilənib)

Rusiya qoşunları Ukraynanın Starı Saltov, Russkaya Tişka, Çerkasskaya Tişka, Koroboçkino, Aseyevka, Çepel və Uda yaşayış məntəqələrində mülki infrastrukturlara atəş açıblar.

Məlumatı Ukrayna Silahlı Qüvvələri Baş Qərargahı yayıb.

“Rusiyanın 2-ci ümumqoşun ordusunun 15-ci motoatcı briqadasının şəxs heyəti döyüşlərdə böyük itki verib. Ukrayna ərazisində hərbi əməliyyatlarda briqadanın 1 800 hərbçisi iştirak edib. Döyüşlər nəticəsində brqadanın təxminən 800 hərbçisi həlak olub, 400-ə yaxın əsgəri yaralanıb”, - məlumatda qeyd edilib.

Bildirilib ki, Rusiya hərbçiləri Verxnekamenka, Zolotoye, Berestovoye və Slavyansk yaşayış məntəqələrini aviasiya-raket, Cənubi Buq istiqamətində Lyubimovka, Dobryanka, Belaya Krinitsa, Şirokoye, Berezneqovatoye Blaqodatnoye, Lyubomirovka və Tavriçesk yaşayış məntəqlərini isə artilerriya atəşinə tutub.

Məlumata əsasən, son sutkada Ukrayna Silahlı Qüvvələri Dnetsk və Luqansk istiqamətində düşmənin 7 hücumunun qarşısını alaraq, 3 tankını, iki zirehli döyüş maşınını, 4 avtomobilini məhv edib. Ukrayna Hava Hücumundan Müdafiə qüvvələri isə Rusiyanın “Orlan-10” tipli 6 PUA-sını sıradan çıxarıb.

Rusiya Silahlı Qüvvələrinin indiyədək Ukraynada itirdiyi canlı qüvvə və hərbi texnikasının sayı məlum olub. Bu barədə Ukrayna Silahlı Qüvvələrinin Baş Qərargahı məlumat yayıb.

Bildirilib ki, döyüşlər nəticəsində Rusiyanın 31 700 hərbçisi zərərsizləşdirilib.

Bundan başqa, hücum edən tərəfin 1 398 ədəd tankı, 3 438 ədəd zirehli döyüş maşını, 711 ədəd artilleriya sistemi, 213 ədəd RYAS-i (reaktiv yaylım atəş sistemi), 96 hava hücumundan müdafiə sistemi, 212 ədəd hərbi təyyarəsi, 178 ədəd helikopteri, 2 421 ədəd nəqliyyat vasitəsi və avtoçən, 13 ədəd gəmi-kateri, 562 ədəd dronu, 125 qanadlı raket və 52 ədəd xüsusi texnikası məhv edilib.

Xatırladaq ki, Rusiya 2014-cü ilin fevralında Ukraynanın Krım Muxtar Respublikasını ilhaq edib. Bundan sonra Ukraynanın Donbas bölgəsində hərbi əməliyyatlara başlayıb. Nəticədə Donetsk və Luqansk vilayətlərinin böyük hissəsi separatçıların nəzarətinə keçib. Döyüşlər Ukraynanın Silahlı Qüvvələri və Rusiyanın dəstəklədiyi qondarma Donetsk və Luqansk respublikalarının silahlıları arasında gedib. Rəsmi Moskva döyüşlərdə iştirakının olması ittihamını rədd edib.

Daha sonra 2020-ci ilin sonundan başlayaraq Ukrayna və Rusiya arasında münasibətlər daha da gərginləşməyə başlayıb, Donbasda təmas xəttində atəşkəsin pozulması mütəmadi xarakter alıb. ABŞ başda olmaqla Ukraynanın müttəfiqləri hərbi və maliyyə cəhətdən rəsmi Kiyevə yardım etsə də, münaqişəyə birbaşa müdaxilə etməyəcəklərini vurğulayıblar.

2022-ci ilin fevralın 21-də Rusiya Prezidenti Vladimir Putin xalqa müraciətində Ukraynanın Donbas ərazisində yaradılan iki qondarma respublikanı tanıdığını bildirib. O, bununla bağlı fərman imzalayıb.

2022-ci ilin fevralın 24-də Rusiya Silahlı Qüvvələri Ukraynanın “denasifikasiya və demilitarizasiyası” (nasizm ünsürlərindən təmizlənmə və silahsızlaşdırılma), habelə Donetsk və Luqansk “respublikalarının ərazi bütövlüyünün” təmin olunması məqsədilə ölkəyə şərq, cənub (Krım) və şimal (Belarus) istiqamətlərdən hücuma başlayıb. Rusiyada “xüsusi hərbi əməliyyat” adlanan bu müharibədə indiyədək Ukraynanın bir sıra şəhərləri, o cümlədən Xerson, Melitopol şəhərləri işğal edilib. Minlərlə dinc sakin həlak olub, milyonlarla insan yurdlarından didərgin salınıb. Müharibənin ilk günlərindən Qərb Rusiyaya qarşı ən sərt iqtisadi sanksiyaları işə salıb. Nəticədə ölkənin milli valyutası rubl çöküş yaşayır. Bu sanksiyalar ilk dəfə olaraq humanitar sahələrə də toxunub.

Bundan başqa, Beynəlxalq Cinayət Məhkəməsində (Haaqa) Rusiyanın Ukraynaya qarşı təcavüzü ilə əlaqədar insanlığa qarşı cinayətlərin araşdırılmasına başlayıb.

Qeyd edək ki, Azərbaycan daxil olmaqla, BMT üzvlərinin mütləq əksəriyyəti Krım yarımadası və Donbası Ukraynanın ərazisi olaraq tanıyır.