“Azərbaycan Respublikası Milli Məclisinin deputatının statusu haqqında” qanuna dəyişiklik edilir.
Dəyişikliklərə əsasən deputatların maaşı kəskin – 43% artırılır, onlara aylıq maaşlarının bir mislində deyil, iki mislində əlavə veriləcək.
Hazırkı qanunvericiliyə əsasən, Milli Məclisin sədri Sahibə Qafarova 2475 manat miqdarında aylıq vəzifə maaşı alırdı. Dəyişiklik olarsa, onun əməkhaqqı nə az, nə çox 43,43 %, yəni 1075 manat artacaq. Bununla da, MM sədrinin aylıq vəzifə maaşı 3550 AZN olacaq.
Bundan əlavə, təklif olunan dəyişikliyə əsasən, Milli Məclisin sədri hər ay vəzifə maaşının iki misli məbləğində maaşa əlavə alacaq. Dəyişiklik qəbul olunarsa, bir ay ərzində Milli Məclisin sədrinin rəsmi gəlirləri 10 650 AZN olacaq.
Maaş artımı sıravı deputatlardan tutmuş, Milli Məclisin sədr müavinləri, komitə sədrlərinə qədər şamil olunacaq.
Belə ki, Milli Məclisin sədrinin birinci müavini Əli Hüseynli bu dəyişikliyə qədər aylıq 2227.5 manat əmək haqqı alırdısa, qanun qəbul olunduqdan sonra onun rəsmi maaşı 3195 AZN olacaq. Bu məbləğin üzərinə hər ay vəzifə maaşının iki misli məbləğində vəzifə maaşına əlavə olunanda isə bu rəqəm 9585 AZN-ə çatacaq.
MM-in sədr müavinləri Adil Əliyev və Fəzail İbrahimlinin maaşları isə 2103.75 manatdan 3017.5 manata qalxacaq. Bu məbləğin üzərinə onların hər ay vəzifə maaşlarının iki misli məbləğində vəzifə maaşına əlavə olunanda isə onların gəlirləri 9052.5 manata yüksələcək.
Milli Məclisin komitə və komissiya sədrlərinin əmək haqları 1980 AZN idisə, bundan sonra bu məbləğ 2840 manat olacaq. Bu məbləğin üzərinə hər ay vəzifə maaşlarının iki misli məbləğində vəzifə maaşına əlavə olunanda isə bu rəqəm 8520 AZN-ə çatacaq.
Milli Məclisin komissiya sədrinin müavinlərinin də əmək haqları isə 1856,25 manatdan 2662.5 manata çatdırılır. Bu məbləğin üzərinə onların hər ay vəzifə maaşlarının iki misli məbləğində vəzifə maaşına əlavə olunanda isə onların gəlirləri 7987.5 manat təşkil edəcək.
Sıravi deputatların maaşları da 43% artırılır. Belə ki, bu günə qədər 1732.5 AZN əmək haqqı alan deputat, bundan sonra 2485 manat vəsait alacaq. Bu məbləğin üzərinə onların hər ay vəzifə maaşlarının iki misli məbləğində vəzifə maaşına əlavə olunanda isə onların gəlirləri 7455 manata yüksələcək.
Deputatların əmək haqlarının artırılması sosial şəbəkələrdə böyük müzakirələrə səbəb olub. Belə ki, bu artıma qədər deputatla ölkədə minimum əmək haqqı (300 AZN) alan vətəndaşın gəlirləri arasında 11.5 dəfə fərq var idisə, bundan sonra bu rəqəm 24,85 dəfəyə çatacaq.
Məlumat üçün bildirək ki, deputatların gəlirlərinin vergiyə cəlb olunan hissəsi yalnız vəzifə maaşlarıdır. Belə ki, onlara verilən vəzifə maaşına əlavələrdən vergi tutulmur.
Qeyd edək ki, sonuncu dəfə Azərbaycanda əhalinin əmək haqları bu ilin yanvar ayında 10-20% civarında artırılmışdı.(marja.az)
Şərhlər
Zamanında Böyük Atatürkdən soruşdular ki,millət vəkillərinin maaşı nə qədər olsun.O,müdrikcəsinə
cavab verdi ki,nə qədər olur olsun,ancaq öyretmenlerin (müəllimlərin) maaşından yüksək olmasın.
Deputatların və məmurların maaşı minimum əmək haqqına baqlanmalidir və minimum əmək haqqının 10 mislindən artıq olmamalıdır Onda deputatlar və məmurlar məcbur olub adı vətəndaşların da maaşını qaldıracaqlar Və minimum əmək haqqından vergi tutulmamalidir
malades ey malades!
Azdır, çox azdır....Həzrət Abbas haqqı deputatların kor quyu kimi olan nəfsinə rəğmən coooox azdır. Həm də ildə bir dəfə yox, hər ay bunların maaşını artırmaq lazımdır ki, daha da millətin belini qıran qanunlar icad eləməyə həvəsləri artsın..
Yazıq kasıbın balasına ayda 50 manat verməyə dövlətin pulu yoxdur. Ancaq bu bizneslə məşğul olan, ali məktəblərin rüşvətxor müəllimləri olan deputatlara pul tapırlar!
Yaxşı olar ki, aşağı təbəqənin də maaşları minimum 600-700 manat olsun.