Xalq artisti Flora Kərimova özünü yandıraraq intihar edən qazinin faciəsinə səssiz qalmayaraq sosial şəbəkədə paylaşım edib.
Flora Kərimova qazini intihar həddinə çatdıranları tənqid edib: "Bu, nə rüsvayçılıqdır?! Utancımdan söz tapmıram! Bir vətən oğlu niyə çörək üçün balasından utanıb, özünü yandırsın?! Dünyada rüsvay olmağımızı, ermənilərin bizə gülməyini keçdik, bəs öz vicdanımızın naləsinə necə dözürük?
O igid müharibədə qardaş, yoldaş itkisi görmüş biridir. İsti yatağımızdan bir tikə çörəyimizə kimi, udduğumuz havayacan bu oğullara borcluyuq. Çətin idi bir insanı razı salmaq? O torpaqları, milli qeyrətimizi utancdan təmizləyən, təbəssümü ilə kişilik dərsi keçən biri niyə özünə qıysın axı?! Bəs etmədi bu torpaq üçün şəhid olan 4 min şəhidin qanı ki, yarıcan canları ilə əlləşən qazilər də "qurban" olsun?!
İcra başçısı deyir ki, hər bir qayğı göstərilib. Hansı qayğıdır ki, o, özünü öldürüb?! Bəsdirin millətin hissiyyatı ilə oynadınız! Millət sizi ittiham etsə, sığındığınız o binalarda daş daş üstə qalmayacaq!"
Xatırladaq ki, bir neçə gün əvvəl Sabirabadda özünü yandıraraq intihara cəhd edən 35 yaşlı qazi Elvin Cəfərov ötən gecə vəfat edib.
Şərhlər
Halal olsun,hörmətli Flora xanım.Sel kimi axıb gələn milyonlardan harınlamış,mənəviyyatları rəndələnmiş,aşılanmış,bütün fikir-xəyalları yalnız və yalnız küplərini doldurmaq olan pardaxsifət məmurcuqlar qazinin halından nə anlarlar?Ömürlərinin bircə gecəsini düşmən gülləsi önündə,bombardmanı altında keçirdilərmi ki anlasınlar?Səngərdə yumşaq kreslolar olmur möhtərəm icra başçıları,bələdiyyə sədrləri,deputatlar.Bayramda-seyranda da millətin o bayramı ac-acından necə keçirdiyini düşünmədiyinizə millət bir növ adətkərdədi,heç olmasa ölümün gözünə dik baxa bilən qeyrətli qazilərimizin qayğısına qalın bir azca.