Gürcüstanın lider avia daşıyıcısı “Georgian Airways” Rusiya ilə uçuşları bərpa etmək üçün icazə alıb.
“AzPolitika.info” “Kommersant” qəzetinə istinadla xəbər verir ki, bu barədə çərşənbə axşamı Gürcüstan Mülki Aviasiya Agentliyi məlumat yayıb.
Məlumatda bildirilir ki, şirkət mayın 20-dən uçuşları bərpa edəcək. Moskvaya uçuşlar həftədə yeddi dəfə həyata keçiriləcək.
Qeyd edək ki, Gürcüstan hakimiyyətindən uçuş icazəsi alan ilk rus şirkəti “Azimut” olub. Onun Moskvadan Tiflisə ilk uçuşu mayın 19-na planlaşdırılıb. Gürcüstan İqtisadiyyat Nazirliyi bildirib ki, ümumilikdə üç Rusiya aviaşirkəti Gürcüstana uçuşlar üçün müraciət edib.
Mayın 10-da Rusiya Prezidenti Vladimir Putin Rusiya aviaşirkətləri üçün Gürcüstana uçuşlara qoyulan qadağanı, həmçinin mayın 15-dən Gürcüstan vətəndaşları üçün viza rejimini ləğv edib. Nəqliyyat Nazirliyi bildirib ki, Rusiya aviaşirkətləri yerli istehsal olan təyyarələrlə həftədə 1 dəfə Moskvadan Tiflisə və əks istiqamətdə yeddi reys həyata keçirəcək.
Gürcüstan Prezidenti Salome Zurabişvili Rusiya hakimiyyətinin qərarını Ukraynada müharibənin davam etməsi fonunda təxribat və qəbuledilməz adlandırıb.
Bununla belə Gürcüstan hökuməti və hakim “Gürcü arzusu” partiyası Rusiyaya uçuşların bərpasına çağırıb. Bir milyon gürcünün birbaşa uçuşların olmamasından əziyyət çəkdiyi vurğulanıb. Həmçinin, hakim partiya Gürcüstanın iqtisadiyyatına potensial ziyan vurduğu üçün Rusiyaya qarşı sanksiyalar tətbiq etməyəcəyini vurğulayıb.
"European Pravda" çərşənbə axşamı Brüsseldə Gürcüstanın xarici və təhlükəsizlik siyasətinin Aİ siyasəti ilə getdikcə daha çox ziddiyyət təşkil etməsindən təəssüfləndiyini yazır. Bunu Brüsseldə keçirdiyi brifinqdə Aİ Xarici İşlər Xidmətinin nümayəndəsi Piter Stano deyib. O, Gürcüstanın Rusiya ilə uçuşları bərpa etmək qərarından narahat olduğunu bildirib.
“AzPolitika.info”
Şərhlər