Belçika Dövlət Təhlükəsizlik Xidməti (VSSE) Rusiyanın Avropa İttifaqındakı missiyasının rəhbəri səlahiyyətlərini icra edən Kirill Loqvinovu Xarici Kəşfiyyat İdarəsinin (SVR) agenti hesab edir.
“AzPolitika.info” xəbər verir ki, bu barədə Almaniyanın “Spiegel” nəşri bir sıra Avropa media qurumları ilə birgə apardığı araşdırmaya əsasən yazıb.
48 yaşlı Kirill Loqvinov Rusiyanın Brüsseldəki daimi nümayəndəliyində diplomat kimi akkreditə olunub. Bir il əvvəl o, missiyanın müvəqqəti rəhbəri və faktiki olaraq səfirin müavini olub. 2010-2014-cü illərdə isə Rusiyanın Almaniyadakı səfirliyində işləyib.
Belçika kəşfiyyatı Loqvinov və Rusiyanın Aİ-dəki missiyasının digər əməkdaşlarının Avropa maraqlarına zidd olan gizli fəaliyyətindən şübhələnir. Kəşfiyyat xidmətləri konkret əməliyyatlarla bağlı məlumatları açıqlamır.
Loqvinovun SVR ilə mümkün əməkdaşlığına dair şübhələr keçən ildən məlumdur. Onlar ilk dəfə AB Observer portalında rus agentlərinin fəaliyyəti haqqında dərc olunan material sayəsində ictimai məkanda tanınıblar. Bu zaman Loqvinov hələ nümayəndəliyin rəhbəri təyin edilməmişdi. Nəşrin araşdırmasından sonra Avropa Parlamenti əməkdaşlarının Loqvinovla mümkün əlaqələri barədə Avropa Komissiyasına sorğu göndərib. Avropa Komissiyası bütün şübhələri rədd edib.
Loqvinovun işi Avropa Birliyində Rusiyanın mümkün casusluğunu araşdırmağa həsr olunmuş “Espiomats” adlı Avropa media layihəsinin əsas mövzusuna çevrilib. “Spiegel”lə yanaşı, Belçikanın “De Tijd” qəzeti, İsveçdən “Expressen”, Estoniyanın “Delfi”, Litvanın LRT, Polşanın “VSquare” və “Frontstory”, Slovakiyadan ICJK və Mixail Xodorkovskinin təsis etdiyi “Dossier” mərkəzi araşdırmada iştirak edir.
Avropa İttifaqının diplomatik dairələrindən verilən məlumata görə, Loqvinovun işi ötən il daxili mübahisə predmetinə çevrilib. Belçika kəşfiyyatı onun persona-non-qrata elan olunaraq ölkədən qovulacaq agentlər siyahısına daxil edilməsində israr edib. Lakin Avropa Xarici Fəaliyyət Xidməti (EAD) Rusiyadakı nümayəndələrinə qarşı mümkün təzyiqlərdən ehtiyat edərək bu addımı atmaqdan imtina edib.
Rusiya Ukraynada genişmiqyaslı müharibəyə başladıqdan sonra Aİ ölkələri Rusiya səfirliklərinin diplomat kimi akkreditə olunmuş yüzlərlə əməkdaşını ölkədən çıxarıb. Brüsseldə isə Rusiya missiyasının 19 əməkdaşı persona non-qrata elan edilib. Bundan başqa, Rusiyanın Belçikadakı səfirliyinin 21 əməkdaşı da qovulub.
Almaniya isə Rusiya diplomatik missiyalarının 40 əməkdaşını persona non-qrata elan edib. Jurnalistlər müəyyən ediblər ki, yaranan boşluqları doldurmaq üçün Rusiya xüsusi xidmət orqanları Avropa Birliyinə nüfuz etmək üçün belaruslu həmkarlarına müraciət etmək məcburiyyətindədirlər.
“AzPolitika.info”
Şərhlər