Böyük Britaniya müxalifətçi siyasətçi Aleksey Navalnının öldüyü “Qütb canavarı” həbsxanasının rəhbərliyinə qarşı sanksiyalar tətbiq edib.
“AzPolitika.info” xəbər verir ki, bu barədə Britaniya hökumətinin saytında məlumat verilib.
Koloniyanın rəhbəri Vadim Kalinin və onun 5 müavininin Böyük Britaniyaya girişi qadağan ediləcək və onların aktivləri dondurulacaq. “Aydındır ki, Rusiya hakimiyyəti Navalnıya təhdid kimi baxıb və dəfələrlə onu susdurmağa çalışıb”, - xarici işlər naziri Devid Kemeron bildirib.
Hökumətin mətbuata açıqlamasında Britaniyanın Navalnının ölümünə cavab olaraq sanksiyalar tətbiq edən ilk ölkə olduğu qeyd edilib.
Bundan əvvəl ABŞ Navalnının ölümü və Ukraynada iki il davam edən müharibə ilə əlaqədar Rusiyaya qarşı böyük sanksiyalar paketi elan edib. Tədbirlər fevralın 23-də elan ediləcək.
Fevralın 19-da Avropa İttifaqı Rusiyanı Navalnının ölümü ilə bağlı beynəlxalq araşdırmaya icazə verməyə çağırıb. Siyasətçinin ölümü ilə bağlı vəziyyəti izah etmək üçün Aİ ölkələrinin xarici işlər nazirlikləri Rusiya səfirlərini çağıraraq izahat istəyib.
“AzPolitika.info”
Şərhlər