Etibar Məmmədov deputatlığa namizəd olacaq? – AMİP-dən seçki açıqlaması

“Parlament seçkilərinin zamanında, yaxud növbədənkənar keçirilməsindən asılı olmayaraq, Azərbaycan Milli İstiqlal Partiyası (AMİP) bu seçkilərdə iştirak edəcək. Artıq bir neçə aydır ki, hazırlıq kampaniyasına start verilib”.

Bunu “AzPolitika”-nın sorğusuna cavab olaraq partiya sədrinin beynəlxalq məsələlər üzrə müavini Elşən Mustafayev bildirib.

Onun sözlərinə görə, ilkin namizədlərin müəyyənləşdirilməsi prosesi həm rayon təşkilatları vasitəsilə, həm də mərkəzi aparata birbaşa müraciətlər əsasında həyata keçirilir: “Artıq bəlli namizədlər var. İstəyirik ki, daha çox və şansları yüksək olan namizədlərlə seçkiyə qatılaq. Hazırkı vəziyyətdə hələlik neçə namizədlə seçkilərə qatılacağımızı deyə bilmərəm. Amma maksimum şəkildə çalışacağıq ki, seçkilərə öz dairələrində nüfuzu olan, ən əsası, namizəd olmaq istəyən üzv və ya tərəfdarlarımızla seçkiyə gedək. Əks halda, bu həm partiyanın gücünün parçalanmasına gətirib çıxarar, həm də artıq maliyyə israfına səbəb olar. Partiya özünün maliyyə və texniki imkanlarını, insan resurslarını rəqabətə davamlı namizədləri müəyyənləşdirib, onlara sərf etməyi planlaşdırır”.

AMİP-in fəxri lideri Etibar Məmmədovun seçkilərə qatılıb – qatılmayacağına gəlincə, E.Mustafayev deyib ki, bu barədə ancaq onun özü açıqlama verə bilər.

“AzPolitika.info”