“Dövlət Su Ehtiyatları Agentliyi ilə yollarımız ayrıldı” – Anar Cəbrayıllı

“Su təsərrüfatı sahəsində fəaliyyətimə son verdim, Dövlət Su Ehtiyatları Agentliyi ilə yollarımız ayrıldı”.

“AzPolitika” xəbər verir ki, bunu adıçəkilən qurumun İctimaiyyətlə əlaqələr şöbəsinin rəhbəri, tanınmış jurnalist Anar Cəbrayıllı özünün “Facebook” səhifəsində yazıb.

“Ötən 13 il yarımda çətin, çətin olduğu qədər də şərəfli və savab sayılan bir işlə məşğul oldum. Bu müddətdə tanıdığım və tanımadığım minlərlə insana yardımçı oldum. Kimliyindən asılı olmayaraq bütün müraciətlərə həssaslıqla yanaşdım, şənbə-bazar, bayram, məzuniyyət, iş və ya qeyri-iş vaxtı demədən hansısa müraciəti cavabsız qoymadım, dövlət müəssisəsinin əməkdaşı olaraq insanlara xidmətdən qürur duydum. Eyni zamanda mürəkkəb və çoxşahəli istehsalatla yaxından tanış oldum, hər bir sahəni öyrənməyə çalışdım və xeyli təcrübə qazandım”, - o əlavə edib.

Anar Cəbrayıllı bundan sonra hansı sahədə çalışacağını açıqlamayıb. “Qısamüddətli istirahətdən sonra yola davam”, - deyə postunu yekunlaşdırıb.

“AzPolitika.info”