Mən, ilk növbədə, Prezident Tokayevə minnətdarlığımı ifadə etmək üçün zəng etdim. Çünki biz bilirdik və məlumat əldə etmişdik ki, qəza baş verən kimi Qazaxıstan xilasediciləri dərhal hadisə yerinə yetişdilər və insanları o dağılmış füzelyajdan çıxartmağa başlamışdılar.
"Report" xəbər verir ki, bu barədə Prezident İlham Əliyev Azərbaycan Televiziyasına müsahibəsində bildirib.
Dövlət başçısı qeyd edib ki, onlar öz həyatlarını risk altına atmışdılar: "Çünki onlar bilmirdilər ki, növbəti partlayış olacaq, yoxsa yox. Çünki təyyarənin bir hissəsi yanmışdı və bu hissədə yana bilərdi. Amma buna baxmayaraq, onlar da əsl qəhrəmanlıq göstərmişdilər. Eyni zamanda, həkim personalının fəaliyyəti də çox qiymətli idi. Çünki yaralı sərnişinlər dərhal tibb məntəqələrinə aparıldılar və buna görə də Prezident Tokayevə mən təşəkkürümü bildirdim".
"Qazaxıstanlı qardaşlarımızın, bacılarımızın həmrəylik nümayişi də mən bilirəm ki, Azərbaycan xalqının qəlbində çox böyük iz buraxmışdır", - deyən Prezident İlham Əliyev vurğulayıb ki, adi vətəndaşlar Azərbaycanın Aktaudakı konsulluğa gələrək gül qoydular, öz münasibətlərini bildirdilər, bizimlə həmrəy olduqlarını bildirdilər:
"Əsl dostluq, qardaşlıq belə olar. Eyni zamanda, mən Prezident Tokayevlə söhbət zamanı Azərbaycanın istintaqla bağlı mövqeyini də bildirdim və bax, sizə dediyim məsələləri də onun diqqətinə çatdırdım ki, biz beynəlxalq ekspertizanın tərəfdarıyıq və heç cür bu məsələni Dövlətlərarası Aviasiya Komitəsinin sərəncamına verə bilmərik. Bu mövqe də anlayışla qarşılandı. Təbii olaraq, bizim dövlət qurumlarımızın nümayəndələri, komissiyanın üzvləri və rəhbərləri, prokurorluq orqanlarının nümayəndələri daim təmasdadırlar. Qazaxıstan da öz növbəsində Dövlət komissiyası yaratmışdır və Prezident Tokayev söhbət zamanı bu barədə mənə məlumat vermişdi. Onlar da təbii olaraq istəyirlər və çalışırlar ki, məsələ tam təfərrüatları ilə açılsın.
Eyni zamanda, mən Prezident Tokayevə də başsağlığı verdim, çünki qəza nəticəsində altı Qazaxıstan vətəndaşı həlak olmuşdu. O da mənə başsağlığı vermişdi. Yəni, bu nə qədər ağır hadisə olsa belə, eyni zamanda, bir sınaq məsələsi idi. Yəni, bu sınaqdan kim necə çıxacaq? Mən şadam ki, yenə də bu faciəyə baxmayaraq, görürəm və əminəm ki, Qazaxıstanda da eyni fikirdədirlər. Bizim dostluğumuz, qardaşlığımız bu ağır vəziyyətdən sonra daha da gücləndi".
Şərhlər
Türkün Türkdən başqa dostu yoxdur. Rus fars isə Türkün 1-ci düşmənidir
Kimin kim olduğu dar gündə üzə çıxar. Məhz bu hislərlə də biz həm də bir yolçuluğa çıxdıq, Türk Devletler Birliyinin, Turanın yaradılması yolçuluğuna. Təbii ki, bu yolçuluq həm də ilkin mərhələdə bir sınaq yolçuluğudur. Ona görə sınaq ki, bu yol dünyanı və xüsusən də bəzi regonal devletlerini meyyus edən bir yoldur. Bu yoldə hər bir üzv dövlət üçün çox rüzgarlar əsə bilər. Amma bütün hallarda biz əminik ki, Qazaxstan kimi, Türkiyə kimi bu yola baş vuranların hər biri asıl, sınmaz olduqları üçün, əsən sərt rüzgarlar onları yollarından döndərməyəcək. Məhz bu qardaşlığın sağlam təməllər üzərində qurulmasının nəticəsidir ki, Qazaxstanlı qardaşlarımızın təyyarə qəzasında göstərmiş olduqları fədəkarlığı Ölkə Başçımızın kövrək notlarla dilə gətirməsi bizləri də həm kövrəltdi və həm də qururlandırdı. Yaşasın Türk devlətlər birliyi, yaşasın qardaşlıq və türklük! Qardaş Qazax xalqına eşq olsun.