“Bu səfər Paşinyana siyasi zərbə vurdu” - “Ermənistana isə heç nə vermədi”

“Paşinyanın Vaşinqtona səfərinin bir əsas məqsədi var idi: Tramp administrasiyasının onun Bayden administrasiyasından aldığı siyasi dəstəyi davam edib-etməyəcəyini anlamaq. O, bu sualın cavabını Vaşinqtonda yalnız siyasi qərarlar verən insanlardan ala bilərdi”.

“AzPolitika” xəbər verir ki, bunu Paşinyanın Vaşinqton səfərilə bağlı paylaşım edən erməni politoloq Suren Sarkisyan yazıb.

Sarkisyan hesab edir ki, Paşinyan ABŞ-də siyasi qərarlar verən əsas fiqurlardan heç biri ilə görüşə bilməyib: “Məlum olduğu kimi, Paşinyan bu şəxslərlə görüşməyib. Əlbəttə, vitse-prezident Vens yaxşı imici və siyasi gələcəyi olan bir fiqurdur, lakin təəssüf ki, o, siyasi qərar qəbul edən şəxs deyil. Əminəm ki, o, administrasiyanın Ermənistana qarşı planlaşdırdığı siyasətdən o qədər də xəbərdar deyil… Ona görə də deyə bilərəm ki, bu səfər Paşinyanın əsas suallarına cavab vermədi. O, yeni administrasiyadan, o cümlədən strateji tərəfdaşlıq xartiyası da daxil olmaqla, nə gözləyə biləcəyini anlamadan Vaşinqtondan qayıtdı.

Bir şey dəqiqdir: bu səfər strateji tərəfdaşa layiq deyildi. Üstəlik, yanlış zamanda təşkil olunub, yanlış görüşlər və mesajlarla müşayiət edilib. Siyasi baxımdan bu, Ermənistana heç nə vermədi, amma Paşinyana siyasi zərbə vurdu ki, bunun da nəticələri hələ görünəcək”.

“AzPolitika.info”