"Müstəqilliyimiz bahasına güzəştlərə getməyəcəyik”

"Durduğumuz yerdə dayanmaq böyük bir güzəştdir. Onlar ərazimizin təxminən 20%-ni ələ keçiriblər. Biz indi "durduğumuz yerdə dayanmaq" prinsipinə əsaslanaraq sülh haqqında danışmağa hazırıq. Bu, böyük bir güzəştdir".

“AzPolitika” xəbər verir ki, bunu Ukrayna Prezidenti Volodimir Zelenski Yaponiyanın “Kyodo News” agentliyinə verdiyi müsahibədə deyib.

Prezidentin sözlərinə görə, Ukrayna "əsl güzəştlərə" hazırdır, lakin mahiyyət etibarilə ultimatuma bərabər olan Rusiya tələblərinə yox: "Müstəqilliyimiz və suverenliyimiz bahasına güzəştlərə getməyəcəyik. Biz ABŞ ilə kompromisləri müzakirə etməyə hazırıq. Amma ruslardan təkrarlanan ultimatumlar almağa hazır deyilik. Onlar təcavüzkardırlar. Hamı bunu etiraf edib. Bu dəyişməyib... Rusiya bizə kompromis olaraq nə təklif edir? Onlar nə etməyə hazırdırlar? Dedilər ki, “Biz sizin digər bölgələrinizi işğal etməməyə hazırıq”. Amma bu, terrorizmdir. Hətta bu sözlərin özü də terrorizmdir. “Mən sizi öldürməməyə hazıram - hər şeyi bizə verin”. Bu nə deməkdir? Bu, kompromis deyil. Bu, ultimatumdur. Buna görə də dedim ki, biz Ukraynanın suverenliyinə və ərazi bütövlüyünə, ordumuza, xalqımıza və uşaqlarımıza hörmət edən kompromislərə hazırıq. Amma biz ultimatumlara hazır deyilik".

“AzPolitika.info”