Ukraynanın Müdafiə Qüvvələri ölkənin cənub istiqamətində hücum əməliyyatlarını davam etdirir və artıq Dnipropetrovsk Oblast ərazisinin demək olar ki, tamamını azad edib.

Bu barədə Ukrayna Silahlı Qüvvələrinin Baş Qərargahının Baş Operativ İdarəsinin rəisi, general-mayor Oleksandr Komarenko “RBC-Ukrayna”ya müsahibəsində bildirib.

Onun sözlərinə görə, indiyədək Ukrayna qüvvələri 400 kvadrat kilometrdən çox ərazidə nəzarəti bərpa edib. Bundan əlavə, daha kiçik bir ərazidə arxa zonanın düşmən qüvvələrindən təmizlənməsi əməliyyatları aparılıb. General qeyd edib ki, vilayətin demək olar ki, bütün ərazisi azad olunub və yalnız üç kiçik yaşayış məntəqəsində əməliyyatların tamamlanması, daha iki yaşayış məntəqəsində isə təmizləmə işlərinin aparılması qalır.

Komarenko əlavə edib ki, fevral ayında əldə olunan uğurlar nəticəsində Ukrayna qüvvələri itirdiyindən daha çox ərazini geri qaytara bilib.

General həmçinin bildirib ki, həyata keçirilən əməliyyat əvvəlcədən planlaşdırılmış hücum əməliyyatıdır və bütün təsdiq və razılaşdırma prosedurlarından keçib. Əməliyyatda desant-hücum qoşunları, hücum bölmələri və bu istiqamətdə müdafiə mövqelərini saxlayan mexanikləşdirilmiş briqadalar iştirak edib.

"AzPolitika.info"